與年輕朋友說轉工
2014/2/24【Marbo-Blog】︰年輕朋友晴晴很上進，最近為了轉工而有點拿不定主意，留言與Marbo商量，筆者一方面感謝朋友的信任，一方面亦覺責任重大，縱不才仍盡力去幫忙分析，希望朋友最後可以做個精明的決定。以下有關對話，筆者再感謝朋友雅量不棄與眾分享經驗。
晴晴︰「考過一次筆試，過了兩次面試後，收到一公營機構的offer，正諗緊轉唔轉好？人工10%加幅，benefit比現時多。但我擔心公營機構進去後，日後人工加幅不知會如何？新工作是contract制，我又擔心萬一唔續約，點算？萬一我唔想做落去，轉返私營，會唔會好困難？被歧視？偶像，您見多識廣，經驗豐富，我想聽聽您的意見。P.S.︰一次筆試，兩次面試，感覺很有挑戰性！」
Marbo︰「恭喜先！真係叻女！我對現時公營機構情況不夠update，知道的是out了點點，請注意！第一，據我所知，一般而言，合約制是大勢，好難有長約，有說以後可能可以轉去長約，不過不容易，預左年年續，有一定壓力，不過，私人工又有咩『保障』呢？你可以諗真啲丫！第二，做落人工點同前途如何，你應該問吓顧主，覺得可以考慮先做一兩年，實際睇清人事同形勢再決定以後點。根據你以前嘅講法，入政府係你理想，咁，呢間係唔係近磅呢？要你自己先知，又有無可能日後轉去『理想政府工』呢？要搞清楚。定係等一等考你心中嘅政府工呢？
拿，做野係講際遇，做過公營亦可以係入翻私營嘅selling point，一切睇你事業運，係唔係？而家無法判斷，唔做會唔會後悔？係就拿出勇氣吧！最多做半年review，唔掂走人仲可以當放左個長假，又或者到時sell自己理解左公營機構運作，所以比只有私營experince嘅更有『多角度思考能力』囉！路係人行出來的，凡事都可以靈活處理，無話一定模式嘅，係唔係？」
晴晴︰「多謝您成日都鼓勵我呀！我都唔係叻，in terms of 人工，大把同我同age嘅高過我。佢地有commission又跑數，但我唔鍾意呃人或者為左自己咁功利。當然，錢冇人嫌多，只係睇我追求嘅係咩生活，我都明白嘅。就算做左公營機構，我都要不停improve自己，會再考更高嘅position！哈！有D人覺得E+嘅年輕人轉工轉得快，唔穩定。但的確，向上流嘅機會係比以前少，如果我留係度，title可能升左，但變動唔會太大。同時，我地呢一代係急進少少嘅。哈哈哈！
最近，我都有追韓劇(睇完要抽離，^^世上冇咁唯美)，自學緊韓文，好有趣，認識左D韓國人，我教佢cantonese佢教我korean，好慶幸我一出世就講幾乎係最難嘅語言。我覺得能夠學一種新語言，可以聽講讀寫都master到，仲可以native，好勁架！」
Marbo︰「事實係叻女，唔駛謙！人比人比死人，世上又何來兩個你呢？無兩個你又點比較呢？係唔係？人地搵錢有人地搵，你生活有你生活，當然，講歸講，我都一樣會同你有同樣心理，因為我都只係凡人，不過見多左，『奶得野多人自醒』，學精左啲咁啦！唔，睇你都係想去試架喇，我都話係咁！不過未見你下決心前，唔想影響你。拿，先做一年，一年內睇吓點，再考試上去。你係天生考試精，有心有力果隻，其實政府工(即係可以靠考試升職果類)幾啱你。哎！趁後生搏吓啦！唔通到我咁嘅年紀先尼料咩？社會都唔比機會我地啲老野啦！你試吓send個cv填咁嘅年紀啦！你就明喇！所以，年輕人，唔好妄自菲薄！.
向上流動難左？幾時都難架啦！流上左果個出尼威，你迷覺得佢易囉！死左果個唔通仲出尼攞條屍比你班友鞭咩？傳媒啲野，為左收視，成日搞野，都明啦！客觀講野？一定跌紙人數少啦！其實，你無睇到我地果個年代死左果班嗟(因為死左當然睇唔到)！我地嘅年代，即係而家年輕人認為易do嘅年代，唔係鬼佬一定升唔到上去最高果浸，永遠都係阿二阿三嘅阿二阿三。咁，中國人點變鬼佬呢？整容+漂白，係唔係好灰？好似Michael Jackson咁？Thats why he did it！強如佢都走唔甩，只不過又有邊個估計到時移勢易，而家美國黑人係最hit囉，歌影視體軍連總統都出埋！
呢樣只係講明時運，你又點知你唔係？將來你啲細路一樣同你講你地以前好撈過佢地！無他，見人已知之事，係人都見到人地容易，正如你今日睇翻尋日個市，乜唔易炒咩？幾多點上落都知啦！咁明日呢？自己面向未知數，當然是徬徨，感到困惑，好多老野話同年輕人講唔掂，又或者相反，都係同一道理，你參透了就明白了。
語言真係好奇妙又有趣，我都好鍾意，只係限於資質，能力有限，只可以說是知少少啦！唔緊要啦！又唔係同人比咩，自己開心迷得囉，係唔係？最近煲劇，睇左神探狄仁傑(1)-(4)輯，一輯40集倒啦，哇，好正喎！必睇囉！我們的對話很有意思，可否讓我行文出blog與大家分享？」
晴晴︰「ok呀！e+我個腦成日都係韓文同韓劇。哈哈！」
Marbo
溫馨啟示︰
本文插畫︰古斯塔夫皓珀Gustave Courbet 名畫「少女與海鷗」‘Mädchen mit Möwen’. Wikimedia Commons.
沒有留言:
發佈留言