2013年6月28日星期五

三柱萬能俠,出撃!(3)

三柱萬能俠,出撃!(3)

2013/06/27Marbo-Blog︰話說「三柱研究所」派出三位英勇駕駛員閒雲、野鶴、真人,駕駛三架三柱變形戰鬥機「攻」、「守」、「備」趕到「氮蹂帝國」五大魔將突襲現場,只見古市山一帶一片火海,人人爭相走避,坐艇的坐艇,潛水的潛水,災情令人慘不忍睹,卻見蠱毒百克男爵『蹄藻蛻弒』在古市山海拔23900米至19500米處橫行霸道,魚肉鄉民(欲返家鄉之民)。另一邊廂則見寅蠻神王夾高『格野螅叉』在銀行金融區大踩特踩,大部分國家銀行已被踩到由之前十層樓高到得返五層樓高,見者莫不咋舌,大叫P.E.(Peak of Edifice建築物頂端)好低好低呀!

閒雲氣勢磅礡︰「各位,我地變身三柱萬能俠一號啦!Get the Change!唔係,係Getter Change!」其餘二人亦異口同聲叫出變身指令,說時遲那時快,三架三柱戰機應聲合體成為三柱萬能俠一號飛龍在天,只見一個鋼鐵巨人背後伸出一雙烈火般長斗蓬,在一陣狂風中飄揚彷似一雙鐵翼,呼的一聲這就揚長而去,不消一轉眼光景,就到了古市山峰!

野鶴咬牙切齒︰「閒雲,用三柱雷電轟天炮一野爆埋去啦!」閒雲言聽計從,只見鋼鐵巨人兩手一伸不知在空中還是袖中閃出了兩把沙漠之鷹死光槍,他這看是一招卻實分為二,左右同時開弓,可說是兵分兩路,一槍如雷電轟頂劈在古市山海拔19500米處,由於十分準繩幾乎一下炒底,巨響一聲當下爆炸截了蠱毒百克男爵『蹄藻蛻弒』的退路!百克男爵不敵即時敗走,不忘出言不順說隨時捲土重來報一箭之仇!另一槍則打在金融區主幹建設路銀行街5.16座標之上,又是一記電光火石釜底抽薪,只見「寅蠻神王」中央大聲一呼,個心都定埋!

真人心情沉重︰「閒雲,你睇啲國家銀行被佢踩到十層樓高得返五層咋!真係歷史新低咁滯喎!」

閒雲悲天憫人︰「係呀,真係可憐!你睇啲之前湧入銀行估有得執嘅跌到一仆一碌,個個損手流血未止……希望我地出呢野幫佢地趕走左隻怪獸,佢地可以慢慢上返尼啦!」

野鶴正氣凜然︰「會嘅!始終係有實力嘅,第二日市況回復正常,啲人忘記左今日嘅傷痛,又會更上一層樓嘅。」

裁慕治鶔所長︰「三位,做得好!不過,寅蠻神王只係匿埋左,隨時可以反擊架!另外三隻亦唔係善男信女,一日未徹底消滅一日都有危機!」

閒雲︰「所長,知道!」

野鶴︰「嘿!啲怪獸一日有氮蹂帝國係背後撐腰,一日都有可能死灰復燃!我地都見慣哂!」

真人︰「唔止呢幾隻,佢地下次隨時都唔知會出啲咩架!總之見佢一鑊食佢一鑊,次次都炒佢底!」

裁慕治鶔所長語重心長︰「唔,大家唔好被一時小勝沖昏頭腦,雖然暫時我地略勝一籌,但係始終佢地咁蠱惑,個底唔係咁容易一時間被人睇倒嘅,是真是假只有拭目以待,保持清醒!再者,呢個亦可能只係對方詐敗誘敵之計!兵不厭詐啊!」

閒雲、野鶴、真人異口同聲︰「明白!」

裁慕治鶔所長心思慎密︰「啊,而家都算告一段落,閒雲你剛才一柱攻擊已用左1/3能量,剩下來果2/3要平均留返比二號、三號三柱萬能俠。萬一氮蹂帝國捲土重來,我地都可以再出擊!」

野鶴︰「所長,我地明白能量始終有限,如果佢地再尼搗亂,我地都唔會輕舉妄動,總之佢地再來打唔低過古市山海拔19500米以下夠多夠深,都有可能只係誘敵之計,出少少力想我地係唔係都出野浪費能量!」

真人︰「唔,到時佢地先一野出齊,我地就無還擊之力喇!」

閒雲︰「上一次『鐵閘萬能俠』就係咁差啲奶野!好彩我地仲有兩柱能量係手,一野兜佢底,咁低炒到條『收鑼男爵』成個彈起,圍魏救趙,先救返佢咋!」

野鶴︰「其實,第二柱都係由我三柱萬能俠二號係咁低炒底,一野金剛巨鑽車過去,啲怪獸通常都會成隻彈起嘅,趁佢一彈我地迷有機會走得甩囉!動力與反動力,自然物理現象嘛!咁回返氣又有能量再攻擊佢喇!佢地來幾多次死幾多次!」

美子小姐嬌滴滴笑說︰「哈哈,野鶴你真係丫,好似係度教書咁,真係搞笑呀你!嘻!」

三柱萬能俠眾人就是這樣有說有笑踏上歸途,美麗夕陽之下又是今次故事告一段落嘅時候。不過,一日氮蹂帝國仍然存在,地球和平一日都係受威脅嘅!努力呀,三柱萬能俠!努力呀,閒雲、野鶴、真人!地球和平靠哂你地喇!各位後會有期!

本故事純屬虛構,如有雷同實屬搞笑!大家千奇唔好對號入座,諗多左喎!各集人物動作及內容,經專人長期嚴格訓練,有一定危險性,讀者觀眾切勿模仿,免生意外,本文作者及有關單位對此概不負責。本文插圖,筆者塗鴉。
免責聲明︰本文乃作者個人心得,未經嚴謹學術及大量數據驗證,只可作參考,亦不可視作任何投資方法或建議,當中亦可能出現計算上的誤差,極端例子及立論的粗疏而有所偏差,請以獨立思考判斷之,本部落絕對反對高風險投機及短線投資,例如是窩輪,期指,期權,槓桿,短線買賣等等,本人之看法絕不適用!所有內容亦只是推測,只供參考,不可盡信!  本網站包含的內容和信息乃根據公開資料分析和演釋,該公開資料,乃從相信屬可靠之來源搜集,這些分析和信息並未經獨立核實和本人並不保證他們的準確性、完整性、實時性或者正確性。在本網站的行情價格、圖、評論和購買或者出售評分應該謹慎作為僅參考使用,本人不應被視為游說任何訂戶或訪客執行任何交易,您須為所有跟隨在本網站的評論和購買或出售評分執行的交易負責。本人之文章純熟個人意見並沒有邀請或遊說任何人作出任何投資或買賣決定,對任何資料提供及網站的信息和內容如有更改恕不另行通知。本人有權但無此義務,改善或更正在本網站的任何部分之錯誤或疏失。用戶在沒有本人明確的書面同意情況下,不得以任何方式複製、傳播、出售、出版、廣播、公佈、傳遞資訊內容或者利用在本網站的信息和內容作商業用途。投資股票和其它有價證券附帶風險,本人鼓勵您使用有效的風險管理和教育工具,但本人不能並不會保證任何在本網站現在或未來的購買或出售評論和訊息會否帶來贏利。過往之表現不一定反映未來之表現,本人不可能作出該保證及用戶不應該作出該假設。本人也許連結訂戶或訪客至其有興趣的網站,但本人只提供此服務給訂戶或訪客並不為此安排負責。本人對於任何包含於、經由、連結、下載或從任何與本網站有關服務所獲得之資訊、內容或廣告,不聲明或保證其內容之正確性或可靠性。對於您透過本網站上之廣告、資訊或要約而展示、購買或取得之任何產品、資訊資料,本人亦不負品質保證之責任。本文的中英原文如有任何岐異,一切以中文原文為準。 
Marbo,三柱投資法,投資理財,歐債危機,牛市熊市,美債危機鬧劇,歐美經濟對中國影響,廿一世紀三國時代,歐債危機,供求曲線之投資應用,成交量的啟示,美國財技OT,QE3,笑說樓價,QE4,財政懸崖,限漲令,樓價.



2013年6月27日星期四

三柱萬能俠,出撃!(2)

三柱萬能俠,出撃!(2)

2013/06/26Marbo-Blog︰「氮蹂帝國」派出五大魔將駛出必殺技突襲地球,三柱研究所內眾人正準備出撃,美子小姐偵察機傳來「古市山」最新災情!古市山係好多人鍾意攀爬嘅奇山,亦因此係怪獸每次必定襲擊嘅地方。係天空上方勉強望到層層雲霧下,古市山依著時間巨輪滾動翻起連綿不斷山谷山峰,人只可以隨著時間向前行唔可以向後行,所以無人會知道前面起伏如何,更遑論哪裡是頂哪裡是底了!不過,由於人們迷信有朝可以係山腳底一口氣摸頂就發達,雖然年中都唔知有幾多人跌傷,沿途仍是絡繹不絕。一路上有唔少相士風水先生擺檔搵食,有啲又夾埋啲生意人衍生工具賣比人,話咩會爬得快啲,其時又常有大鱷出沒襲人,實在十分凶險,所以政府一直都禁止未成年人上山嘅。

美子小姐心情沉重︰「所長,我而家係古市山,現場一片火海,死傷慘重,好多人係之前嘅山峰海拔23,900米左右跌落尼,一仆一碌都未知碌完未,而家跌到去嘅位置大概係海拔19,500米。啲坐過山車嘅被怪獸玩到殘哂,個個體力不支,紛紛暈倒嘔白泡。海邊好多想返家鄉嘅人坐哂艇等人救,有啲仲坐左潛水艇被怪獸打到沉落海底咁滯,都唔知識唔識浮返上尼。啊!一路上仲見到好多地球防衛軍傷兵,一定係早到左果班,佢地無哂彈藥,全無還擊之力,惟有同啲人一齊坐艇等救援,有好多隻艇仲穿左窿入緊水……啲嘍囉又出尼嚇人,想人地死快啲咁……

裁慕治鶔所長一貫處變不驚︰「美子,咁你有無見倒啲怪獸嘅位置?」

美子小姐左顧右盼︰「上下奇手魔龍『謬翼皂賈』同埋毒針王戴慷怖鋯『蠅痢搗蛻』好似唔多覺喎,可能係匿埋左係地底掘緊氹比人踩,我試過用三柱雷達都未搵倒佢地。變態獸安賠小三『鈤鉛溾慄』就係海邊不遠處,閃閃縮縮,鬼鬼祟祟,好似等緊啲咩先出手興風作浪咁喎!」

閒雲咬牙切齒,係最熱血果個1號機駕駛員︰「蠱毒百克男爵『蹄藻蛻弒』呢個衰人係邊呀?」閒雲對面街果檔老友「鐵閘萬能俠」嘅死對頭「收鑼男爵」係百克男爵契兄弟,兩個男爵做得契兄弟梗係臭味相投,最叻咩唔講都知,總之都係咁陰陰濕濕,成日諗埋啲衰野出尼損人利己!雖然話就話各為其主,之但係佢地係出賤招搞人地果隻先乞人憎嘛!

美子小姐一臉溫柔︰「唔,閒雲你冷靜啲……百克男爵唔見喎,唔通返左去佢地美洲嘅秘密要塞?寅蠻神王夾高『格野螅叉』就係度仲未收手咁。嘩!成條銀行金融街被踩到反轉喇!好多銀行、保險公司都被踩到扁哂,就尼衰到貼地,不過佢唔知係唔係想踩到佢地陷落地底先夠皮,而家一時判斷唔倒喎!嘩,啲無知市民之前湧入銀行估有得執,血肉長城咁,好多都即時損手,流血未止……

野鶴揸2號機,個樣一向好Cool,仲一邊彈琴一邊合埋眼擰轉面唔望鏡,其實佢係外冷內熱,一切都看在眼裡,心裡有一團熱火,把口就淡淡說出︰「美子小姐,班衰人就等我一個去收拾得喇!你快啲返尼啦,唔好係現場阻手阻腳。」

美子小姐花容月貌心甜一笑,知道野鶴嘅心意係怕佢有危機,其實三柱偵察機設備先進,佢有隱形功能同死光防護罩,而且,佢嘅偵察距離怪獸係無可能攻擊倒嘅,呢啲大家早就知道,唔係又點會捨得比佢出去呢︰「知道喇!嘻!野鶴你都要小心,要留返啲靈感,返尼你要彈琴比我聽架!」野鶴嘴角露出一絲不易被察覺嘅微笑,輕輕掩上琴蓋,緩緩站起身,佢一向都鍾意型褲,手插褲袋,半倚牆邊。

真人負責3號機,性格正直,直腸直肚,耐力驚人,最叻係玩埋伏,穩守突擊︰「所長,你不如叫美子小姐返研究所啦!我地而家就去出擊!」

裁慕治鶔所長好冷靜︰「唔,都好,咁美子你返尼啦!但係你地三個都唔好衝動,睇定啲先!唔知氮蹂帝國仲有咩陰謀,呢個或者係個圈套!」

閒雲、野鶴、真人異口同聲︰「就算明知道係陷阱有危險,為左正義我地都唔怕……」三位正義駕駛員一向以打撃怪獸維護世界和平為己任,過去多次與氮蹂帝國戰鬥,已獲得豐富經驗,見慣各類怪獸毒招,佢地不但有良好默契,更加熟用三柱戰術,互相守備呼應……就係呢個時候,發射台地勤報告一切已準備就緒,三部機「攻」、「守」、「備」隨時可以出撃!

本故事純屬虛構,如有雷同實屬搞笑!大家千奇唔好對號入座,諗多左喎!

註︰「溾」粵音「匯」,「鈤」粵音「溢」。本文插圖,筆者塗鴉。

Marbo
免責聲明︰本文乃作者個人心得,未經嚴謹學術及大量數據驗證,只可作參考,亦不可視作任何投資方法或建議,當中亦可能出現計算上的誤差,極端例子及立論的粗疏而有所偏差,請以獨立思考判斷之,本部落絕對反對高風險投機及短線投資,例如是窩輪,期指,期權,槓桿,短線買賣等等,本人之看法絕不適用!所有內容亦只是推測,只供參考,不可盡信!  本網站包含的內容和信息乃根據公開資料分析和演釋,該公開資料,乃從相信屬可靠之來源搜集,這些分析和信息並未經獨立核實和本人並不保證他們的準確性、完整性、實時性或者正確性。在本網站的行情價格、圖、評論和購買或者出售評分應該謹慎作為僅參考使用,本人不應被視為游說任何訂戶或訪客執行任何交易,您須為所有跟隨在本網站的評論和購買或出售評分執行的交易負責。本人之文章純熟個人意見並沒有邀請或遊說任何人作出任何投資或買賣決定,對任何資料提供及網站的信息和內容如有更改恕不另行通知。本人有權但無此義務,改善或更正在本網站的任何部分之錯誤或疏失。用戶在沒有本人明確的書面同意情況下,不得以任何方式複製、傳播、出售、出版、廣播、公佈、傳遞資訊內容或者利用在本網站的信息和內容作商業用途。投資股票和其它有價證券附帶風險,本人鼓勵您使用有效的風險管理和教育工具,但本人不能並不會保證任何在本網站現在或未來的購買或出售評論和訊息會否帶來贏利。過往之表現不一定反映未來之表現,本人不可能作出該保證及用戶不應該作出該假設。本人也許連結訂戶或訪客至其有興趣的網站,但本人只提供此服務給訂戶或訪客並不為此安排負責。本人對於任何包含於、經由、連結、下載或從任何與本網站有關服務所獲得之資訊、內容或廣告,不聲明或保證其內容之正確性或可靠性。對於您透過本網站上之廣告、資訊或要約而展示、購買或取得之任何產品、資訊資料,本人亦不負品質保證之責任。本文的中英原文如有任何岐異,一切以中文原文為準。 
Marbo,三柱投資法,投資理財,歐債危機,牛市熊市,美債危機鬧劇,歐美經濟對中國影響,廿一世紀三國時代,歐債危機,供求曲線之投資應用,成交量的啟示,美國財技OT,QE3,笑說樓價,QE4,財政懸崖,限漲令,樓價.





2013年6月25日星期二

覆見習地球防衛軍書

「覆見習地球防衛軍書」

2013/06/24Marbo-BlogMarbo自從一時口快洩露左自己係「三柱研究所」撈之後,就收到唔少朋友留言,內容主要梗係講點撈同點打怪獸啦!都有唔少讚我架萬能俠2號靚嘅,多謝哂先!下次同一號三號寫真完再鋪上尼吓。其中,有位自稱做緊見習地球防衛軍嘅讀者Leo(懷疑真正身份係「北斗神拳」果個雷奧?),宇宙曆623日電子飛鴿傳書,閒雲、野鶴、真人見內容茲事體大,即與裁慕治鶔所長認真討論,現將來信及回信內容展示如下︰

Leo(2013623)︰「果然多才多藝!琴棋書畫樣樣皆通,彈得、寫得、畫得、還有三柱棋法。佩服!面對『氮蹂帝國』陰謀破壞世界和平,我也蠢蠢欲動,準備加入地球防衛軍反擊部隊,一試苦讀多時之『三柱秘笈』飛行法。可惜,仍未能將三柱秘笈的真氣融會貫通,腦內仍有混沌。嘗試珠算一番:由520近期最高統帥23493621B師令20263,足有三千被殺,月內總成交量達47,797,478,800。『氮蹂帝國』派予慘戶的氮貨彈是否應已派完?按『公球秘笈』所記,價跌量升實是派氮貨彈的訊號,那麼621價小跌約120,但加倍量升達4,084,032,800,是否仍是『氮蹂帝國』派氮貨彈,還是已經開始反手行動?煩請賜教,期待『三柱萬能俠,出擊!』次回篇!見習地球防衛軍上。」

裁慕治鶔所長(2013623)︰「Marbo話多謝多謝,兄台有禮喎!首先,佢係作曲家,唔係鋼琴家,彈琴唔算得。拿,睇親套套超人怪獸片都有啦,叫得做地球防衛軍一般都係魚腩部隊,出親尼都係被人炸同犧牲嘅。佢一向都唔加入架,佢而家係『三柱研究所』撈,擔正做三柱戰鬥機師揸2號機喎!

啊,聽美子小姐講好似仲有地勤空缺喎,你知啦上次年初同『恐燶帝國』炒左一野打贏左,好多人被人挖角過檔囉……不如你寄CV比人事部試吓啦,幾好Paid架,近年收入一年都有20%左右加幅咁啦,視乎有幾多怪獸打,同有幾金咁啦!價格可升可跌,過去表現唔代表未來。

你知喇,佢地做駕駛員講得好聽叫守衛世界和平,講實在迷又係手作仔!唉,真係手停口停,要好天搵埋落雨柴,我成日都教佢地要理財有道,量入為出架,啲怪獸話就話一年來幾野搵食,我地又有工開嗟,都講唔實加嘛,做人穩陣啲好。啊,Before I forget,隔離果檔超力電磁俠上年出復刻,好正,搞到個場幾生猛呀!今年都好似唔夠人用咁,阿Marbo同佢地4號機位南原鶴子都好有偈傾,你問吓佢撻朵得唔得,可能有用嘅。

講開地球防衛軍,佢地一向都係魚腩部隊,除左美國拍果套鴨屎綠哥師奶勉強唔算係之外。不過果套野唔係正宗野唔計囉。佢都算係映衰哂啲怪獸喇,有乜理由做得怪獸連石油鼓都唔踩爆一兩件先!仲要被爛鬼響尾蛇直昇機圍喎,隻野瘦蜢蜢玩唔夠秤,通街跳捐來捐去閃成何體統?屋企條鹽蛇都大搖大擺過佢啦!而家呃細路咩!佢地識唔識架???真係睇到眼火爆!美國佬啲野。好彩唔係尼幫襯我地,唔係都唔知開唔開工好,你知啦我地出親野都三工加嘛!咁,持平啲講,你仲係想撈地球防衛軍(可能等緊被人Promote或者過Probation,係唔係?),不如申請調去美國果邊啦,可能好撈啲嘅。班友又吹美金強勢,又話失業率持續向下咁話咯!

講返正題,『月內總成交量達 47,797,478,800……』,唔好咁睇成交量,因為咁係會Double Count左好多,要每日去推敲再加減出個淨成交量(係買方定賣方),你之後嘅分析亦因此有欠全面。任何技術分析只係倒後鏡睇路,只知今天及以前,對估計未來你最好唔好盡信,只可以作一個參考,即係你要先對後市有個Vision,然後,再用佢地呢互相引證,而唔係睇到有咩技術指標就定個View。你識揸車應該明嘅,如果唔識揸車,你搭車時自己觀察吓啦!

為左防止被外星敵人發現,為左守衛地球,維護世界和平,三柱研究所係保密嘅。但係三柱秘笈係公開嘅,唔算咩秘笈。你只要上網打暗號『三柱投資法』或者密碼『Marbo』就可以找到,亦唔駛百年難得一見骨幹精奇嘅奇才先可以成功嘅,街邊兩毫子一本都唔駛,你只要係善良嘅地球人上網一查就Free比你,千奇唔好洩露出外太空!不過,佢內容與成交量無直接關係,只係一個『攻、守、備』策略。

好啦,講返你問嘅成交量。價跌成交量增(不是大,係增加)係供應增加,『其中一個可能』係大戶出貨,尤其是好大成交量果隻(再配合陰陽燭價格分析)。你諗吓老散邊有咁多貨先?點後生大把貨都唔夠人地啦!不過,近年多左好多基金仔,銀碼算真正大戶中嘅中小企(咩係真正大戶?迷魔高一丈四大行果幾味野囉),行為就係專業老散,佢地出手一般都係電腦化,迷信程式化,亦流行密食當三番,所以啲盤可以好散。佢地係啲咩人多?你無理由諗唔倒嗟,人地咁『強』,係唔係先?唔通係用買餸錢玩果位師奶咩?不過,公道啲講句,人地開片大撼大,啲細嘅又七鬥七咁去埋一份玩乜輪,咁劈開無眼加嘛,人地都唔係玩針對嘅,唔駛諗多左,買餸嘅就買餸啦!

但係,呢個只係其中一個可能,舉多一個例,有時可以係全世界都好驚,一齊斬倉要錢唔要貨一件不留,咁又另計喎!因為可以係有超級大戶一票獨贏同你一口哂冷掃哂,咁就唔係派貨而係收貨喇!明唔明?仲有其他可能,留返比你諗喇。係唔係好複雜呢?又唔算嘅,你咁聰明連我地三柱研究所個地埗都括倒,係唔係先?所以,出尼行要瞻前顧後,起碼由上一個浪底/浪頂數,每日分析推敲其供求關係再統計,先可以話係比較合理啲。之但係,你又唔好咁開心,以為拿個Excel用隻Mouse揦上揦落,加加減減就搞掂喎,人地仲有場外、黑池、黑期、射數、借貨、出乜輪就一野暗中卸哂比啲老散,真係中左暗器毒發身亡都未知咩事……就算係名門正派長倉嘅,都可以係玩貨如輪轉,出十入一,入十出一,明沽實揸,明揸實沽,同你做動態出貨入貨……咁你諗吓你嘅分析有幾大把握呢?

拿,又唔駛灰心嘅,我地研究唔係用佢尼做決定,而係用尼做其中一種引證,Cross check吓自己嘅觀點,『多算多勝,少算少勝,不算不勝』,亦可以當係一個興趣過吓日晨,係班Friend面前扮吓野,又或者可以咁講,去增加自己能力去避免犯一啲『唔應該犯嘅錯』。咩叫『唔應該犯嘅錯』?當你越識野越有經驗,就會有越多『唔應該犯嘅錯』。例如中學生睇返小學生嘅錯﹔大學生睇返中學生嘅錯……好多都係佢地認為『唔應該犯嘅錯』,只係被佢地睇果位當事人唔係之嘛!點解?知識水平同經驗嘅差距囉。明唔明?

世上無方法亦無人可以準確預知未來嘅。科學上a+b=c唔係準確預知未來,係在一定條件下了解因果,再在此一定條件下由一定的因推算出一定的果。準確預知未來係連『一定條件』都無嘅,呢個係神嘅領域,唔係人應該去追求或者以為可以追求到嘅。我地只係凡人,做唔倒唔駛唔開心,煩惱皆因強出頭,勉強人做超越人能力嘅事,當然係煩惱啦!不過,有問題有煩惱亦唔駛唔高興,因為證明我地仲係人,仍是活著嘛!應該好開心丫!」

Leo(2013624)︰「多謝裁慕治鶔所長與三柱機師超光速的賜教!作為典型見習魚腩防衛軍,一向也準備搵美子小姐談加入的事,奈何未等到機會,希望今次怪獸又出來,自己可以加入有工開。上回收到初步回鴿後,已經立即再輸入密碼『成交量的啟示』入導航系統,發現之前上飛行課時釣左魚,攪到好多野一知半解亂哂籠!係時候認清大方向同沿途坐標,再上路!」

裁慕治鶔所長(2013624)︰「哎!一日氮蹂帝國存在,地球嘅和平都會受到威脅嘅!但係正義係唔會放棄嘅!努力呀!三柱萬能俠!努力呀!閒雲、野鶴、真人!努力呀!各位!怪獸嘅本份係出尼踩石油鼓,令啲無辜市民雞飛狗走蒙受損失加嘛!啲八手三郎仕Die佬戰隊少少地末變大之前,都起碼要出兩野,點都爆吓石啦!細嘅唔食大嘅都要食丫嘛!拿,上堂真係唔好唔聽書呀!我知我地同班好多靚女,又美子小姐,又南原鶴子.....新同學又有初音未來.....涼宮春日.....,上年又尼左班『一騎當千』(『騎』讀冀,『當』讀擋,即是一()將足以抵擋千軍之意),今年又有Sekirei.....哎,男人都係以事業為重好啲!」

Marbo
免責聲明︰本文乃作者個人心得,未經嚴謹學術及大量數據驗證,只可作參考,亦不可視作任何投資方法或建議,當中亦可能出現計算上的誤差,極端例子及立論的粗疏而有所偏差,請以獨立思考判斷之,本部落絕對反對高風險投機及短線投資,例如是窩輪,期指,期權,槓桿,短線買賣等等,本人之看法絕不適用!所有內容亦只是推測,只供參考,不可盡信!  本網站包含的內容和信息乃根據公開資料分析和演釋,該公開資料,乃從相信屬可靠之來源搜集,這些分析和信息並未經獨立核實和本人並不保證他們的準確性、完整性、實時性或者正確性。在本網站的行情價格、圖、評論和購買或者出售評分應該謹慎作為僅參考使用,本人不應被視為游說任何訂戶或訪客執行任何交易,您須為所有跟隨在本網站的評論和購買或出售評分執行的交易負責。本人之文章純熟個人意見並沒有邀請或遊說任何人作出任何投資或買賣決定,對任何資料提供及網站的信息和內容如有更改恕不另行通知。本人有權但無此義務,改善或更正在本網站的任何部分之錯誤或疏失。用戶在沒有本人明確的書面同意情況下,不得以任何方式複製、傳播、出售、出版、廣播、公佈、傳遞資訊內容或者利用在本網站的信息和內容作商業用途。投資股票和其它有價證券附帶風險,本人鼓勵您使用有效的風險管理和教育工具,但本人不能並不會保證任何在本網站現在或未來的購買或出售評論和訊息會否帶來贏利。過往之表現不一定反映未來之表現,本人不可能作出該保證及用戶不應該作出該假設。本人也許連結訂戶或訪客至其有興趣的網站,但本人只提供此服務給訂戶或訪客並不為此安排負責。本人對於任何包含於、經由、連結、下載或從任何與本網站有關服務所獲得之資訊、內容或廣告,不聲明或保證其內容之正確性或可靠性。對於您透過本網站上之廣告、資訊或要約而展示、購買或取得之任何產品、資訊資料,本人亦不負品質保證之責任。本文的中英原文如有任何岐異,一切以中文原文為準。 
Marbo,三柱投資法,投資理財,歐債危機,牛市熊市,美債危機鬧劇,歐美經濟對中國影響,廿一世紀三國時代,歐債危機,供求曲線之投資應用,成交量的啟示,美國財技OT,QE3,笑說樓價,QE4,財政懸崖,限漲令,樓價.







2013年6月22日星期六

三柱萬能俠,出擊!(1)

三柱萬能俠,出擊!(1)

2013/06/21Marbo-Blog︰「氮蹂帝國」邪惡陰謀破壞世界和平,派出五大魔將駛出必殺技突襲︰上下奇手魔龍「謬翼皂賈」,蠱毒百克男爵「蹄藻蛻弒」、變態獸安賠小三「鈤鉛溾慄」,毒針王戴慷怖鋯「蠅痢搗蛻」,寅蠻神王夾高「格野螅叉」,前後夾攻,大踩銀行金融街,攻擊碼頭出入口航道,火燒石油鼓油庫各類資源礦場……一時間走避不及者眾,死傷無數,哀鴻遍野,風聲鶴唳!可惜,地球軍國防部「愛國導彈攔截者」P.M.I.(Patriotic Missile Interceptor)數值未夠50%,原來未差夠電,無法起動還擊!戰況每況愈下,似是無險可守,一時人人自危……
次回預告︰就在最緊急關頭,人人都爭先恐後逃生,千鈞一髮電光火石間,三柱研究所,三個英勇駕駛員︰閒雲、野鶴、真人,分別坐上裁慕治鶔所長研發三部超能力變形戰機「攻」、「守」、「備」,合體變身「三柱萬能俠」,出擊!

本故事純屬虛構,如有雷同實屬搞笑!大家千奇唔好對號入座,諗多左喎!

註︰「溾」粵音「匯」,「鈤」粵音「溢」。

Marbo
免責聲明︰本文乃作者個人心得,未經嚴謹學術及大量數據驗證,只可作參考,亦不可視作任何投資方法或建議,當中亦可能出現計算上的誤差,極端例子及立論的粗疏而有所偏差,請以獨立思考判斷之,本部落絕對反對高風險投機及短線投資,例如是窩輪,期指,期權,槓桿,短線買賣等等,本人之看法絕不適用!所有內容亦只是推測,只供參考,不可盡信!  本網站包含的內容和信息乃根據公開資料分析和演釋,該公開資料,乃從相信屬可靠之來源搜集,這些分析和信息並未經獨立核實和本人並不保證他們的準確性、完整性、實時性或者正確性。在本網站的行情價格、圖、評論和購買或者出售評分應該謹慎作為僅參考使用,本人不應被視為游說任何訂戶或訪客執行任何交易,您須為所有跟隨在本網站的評論和購買或出售評分執行的交易負責。本人之文章純熟個人意見並沒有邀請或遊說任何人作出任何投資或買賣決定,對任何資料提供及網站的信息和內容如有更改恕不另行通知。本人有權但無此義務,改善或更正在本網站的任何部分之錯誤或疏失。用戶在沒有本人明確的書面同意情況下,不得以任何方式複製、傳播、出售、出版、廣播、公佈、傳遞資訊內容或者利用在本網站的信息和內容作商業用途。投資股票和其它有價證券附帶風險,本人鼓勵您使用有效的風險管理和教育工具,但本人不能並不會保證任何在本網站現在或未來的購買或出售評論和訊息會否帶來贏利。過往之表現不一定反映未來之表現,本人不可能作出該保證及用戶不應該作出該假設。本人也許連結訂戶或訪客至其有興趣的網站,但本人只提供此服務給訂戶或訪客並不為此安排負責。本人對於任何包含於、經由、連結、下載或從任何與本網站有關服務所獲得之資訊、內容或廣告,不聲明或保證其內容之正確性或可靠性。對於您透過本網站上之廣告、資訊或要約而展示、購買或取得之任何產品、資訊資料,本人亦不負品質保證之責任。本文的中英原文如有任何岐異,一切以中文原文為準。 
Marbo,三柱投資法,投資理財,歐債危機,牛市熊市,美債危機鬧劇,歐美經濟對中國影響,廿一世紀三國時代,歐債危機,供求曲線之投資應用,成交量的啟示,美國財技OT,QE3,笑說樓價,QE4,財政懸崖,限漲令,樓價.

2013年6月8日星期六

談天說地講投資

談天說地講投資

2013/06/08Marbo-Blog
︰以下是Marbo問準了晴晴行文關於2013/5/256/8的留言對話。

晴晴(2013525)︰「哈囉,偶像︰P!話咁快又就6月啦!時間過得好快!好開心又睇到你的新文章(高人甩工傷,會有咩啟示?)啦,又跟你學吓野!文末個Story我睇得明啦!哈哈哈!高人都覺得E+個市太高?(筆者6/8按︰今日看之,事實勝於雄辯)早個排先同你講升咁多,過一排又單日跌左幾多吓。哈哈!個日百忙中,望一望個市,睇到佢跌咁多都幾Surprise ^^,我今年都仲係兩手空空!^^ 另外,你早前有啲『成交量的啟示』文章,我有睇過架,不過好似多與少都有兩方面的解釋,睇完成交量都好似Conclude唔到E+會點。真係當係Reference咁?睇成交量都睇到我一頭煙,睇唔通。可能我都係唔夠經驗啦!我都係學習緊。如果你出書,我一定會支持你架!你有冇諗過會出返本?^^

Marbo(2013526):「出書?唔,好難嘅,以我接觸過來講,好多書商本身唔係真心愛文化或者識文化,而係密底算盤好難交易,可以話只係一啲極之數口精嘅商人,在商言商唔怪得人,只係我亦可以有我選擇。不過,多謝你支持先。睇得明個故仔,好叻女喎!講翻個市,成交量只係一個助證,佢唔可以估計未來,其實有咩可以呢?任何技術分析都只係倒後鏡睇野,不過,我地最少可以明白而家同以前發生咩事,好過盲灑灑耍盲雞啦!

後生女,我自創嘅都睇左廿幾年,你又點可以一夜成師呢?路行啱左就已經好好嘞!你問可唔可以睇到後市會點,老實講,對一啲大勢我有時係可以嘅,但唔係時時都可以。即使真係睇到,為左保護讀者,免被誤解或者斷章取義,我都唔會寫明出來,最多係暗示吓講吓故仔,有緣者明就明,唔明就算。不過,少少地都有個Tips,你可以數吓成交量或者可以估倒吓出貨果位有幾大決心嘅,點數法就靠你自己去領悟嘞!

好似日本跌成千點果兩日(第二日係波幅成千點)個成交量係大到嚇親人,咁你話邊度有人有咁多貨沽,又有咁多人接呢?如果你明白,咁你認為下星期就完左,即刻天下太平定係會點呢?當然,人地可以玩野同你虛則實之,實則虛之,細路都識『玩狼來了』啦!你未講過大話咩?咁人地億億聲又點解會純情過細路呢?不過,你要明白台戲越大人地成本同風險就越大,胃口當然亦越大啦!最後,今次調整比啲耐性,到位就要當機立斷,都係果句『攻、守、備』三柱投資法,不過千奇唔好玩孖展同衍生工具呀!」

晴晴(2013528)︰「自資出書係咪好貴架?呢啲我都唔係好清楚。嘻嘻!『你可以數吓成交量或者可以估倒吓出貨果位有幾大決心嘅,點數法就靠你自己去領悟嘞……好似日本跌成千點果兩日(第二日係波幅成千點)個成交量係大到嚇親人,咁你話邊度有人有咁多貨沽,又有咁多人接呢?』呢樣野呢,我真係要返去睇下Data先得,每日睇少少,如果一時間睇太多,我會覺得好悶^^

琴日個市都好牛皮,如果全職睇佢,真係悶親人。其實論宏觀經濟,日本、歐、美三邊我都覺得唔係好掂當。個市某程度上我覺得有啲唔Make Sense架,好似未反映哂E+啲經濟狀況咁。我覺得咋…..唔知啱唔啱?『今次調整比啲耐性,到位就要當機立斷』我啲耐性真係好左好多!等左咁耐都冇手痕發作。至於幾時到位,有時都好唔肯定架,有時又唔係驚跌,而係又會諗跌到底未,哈哈,常見毛病(筆者按︰吾故有『攻守備,三柱投資法』也)

『千奇唔好玩孖展同衍生工具呀!』哈哈哈!孖展呢,我親戚有過Bad Experience呀!所以我都對佢有陰影,唔會玩(買樓除外,Mortgage都有啲似Margin)。衍生工具呢?我好耐冇玩啦!好乖。當然,急跌當日,我聽到身邊有人賺過百萬啦!聽到佢買咁多個陣,我都驚,真係冇咩資格玩呢啲,我怕個心臟仔頂唔住,未開盤我已經猝死。」

Marbo(2013528):「持平啲講,我無認識哂所有書商,我理解嘅只係個別個案,唔代表全部係咁。據我認識所知,其中最大問題係點解要作者出埋錢比班友零成本攞去賺錢?部份不良商人甚至可以一啲力都唔出坐享其成,之後唔得仲可以話你啲野唔得,甚至根本無印過咁多本但錢照收,你話要睇有幾多本書佢就同你收倉租,計落當然係你蝕底啦!總之極不合理!不合理嘅野最後都係無好結果嘅。如果志在發表,好似我咁寫Blog益街坊好過啦!當然,如果你好有朵本書自己會行,例如係哈理波特作者之類,佢地梗會仆崩頭啦!不過,人地有咁嘅名氣仲駛括你班友咩?

成交量少價平(微變)即係供求兩閒,大家在觀望。有人贏得一百萬,即係有人輸得一百萬。玩衍生工具即係賭,賭錢最後係點唔駛多講。當然,賭徒唔會認同我,無所謂,人各有志嘛。股市唔一定同步反映現實嘅,不過,大勢係唔會改變嘅。投資,總之唔啱價唔出手,最多無得賺但一定唔可以輸!係森林中我呢隻動物唔會肥得去邊,不過又唔會食唔飽,但一定好長命好襟撈吓。」

晴晴(2013529)︰「O.I.C.,原來係咁。有時,我都見啲報章報導啲人自資出書添,咁搵笨的話都係唔好咁搞法好啲。^^個市話完佢牛皮,尋日下午即刻上返,但係今日又跌返。哈哈!真係難以觸摸。Bird Flu又返返黎LuMarbo,你對MPF有咩睇法架?會唔會花時間去Manage佢?定會覺得錢少唔理佢?最近,政府又再出i-bond,時間過得好快,原來已經係第三次!買呢d都幾麻煩,又多手續,我諗緊好冇試玩下︰P

Marbo(2013529):「人地嘅野人地嘅事,人各有志,講真,佢地『出書』亦志不在此丫!MPF我當然會Manage啦!錢無話多少,應做就要做。個市表面難捉摸,其實係有一定規律,你睇多啲海浪就會明白。我一向專心,所以好少搞第二啲野。你自己決定啦!」

晴晴(2013529)︰「哈哈!明白!我E+Study緊啲MPF資料。我問身邊啲朋友同事,佢地個個又話錢少,又話有排都未有得拎,Manage黎冇意思,對話中好似變左我好市儈咁,但我鍾意Manage^^。嘻嘻!已經睇中左啲我想要啲野,但好多Terms好麻煩。唔通好多香港人都唔理個MPF Account???我比較i-bondStock,其實i-bond個回報又唔算好好(筆者接︰注意兩者風險不同,不可同日而語),只係高過現時存款利率咁囉(筆者接︰持平點說,今時今日都算幾高)。但我對債券有啲戒心,現時太多垃圾債券,可能靠自己玩下StockMPF就算。MPF真係被迫玩,哈哈!」

Marbo(2013530):「『佢地個個又話錢少,又話有排都未有得拎,Manage黎冇意思』講得呢句即係證明左講者投資概念水準係點囉!我不可以勉強別人不做愚蠢決定,只可以讓自己作出精明選擇。歪理嘅野,算把啦,迷由得佢地囉!政府都係機構性投資者,當然有料到,你話發債係跌市做,定係升市好呢?咁你有無留意上兩次出個市係點呢?啲人反應又係點呢?與其觀察啲人飲茶有無講股票,銀行股票機有咩人排隊,個Sample Size咁細同咁Bias,不如睇哂全港投資者嘅真情表述(因為唔可以齋Up,認購就出錢,唔就唔出,無得扮),咁迷仲好?i-bond曾於20117月及20126月發行,自己睇吓個圖啦。」

晴晴(2013530):「哈哈!咁I am not alone!起碼仲有啲人同我一樣會去ManageMPF Account,不過我身邊真係好少人睇,講黎都哂氣,我自己睇同Study就算了。i-bond係咪跌市時出好啲呢?咁會多啲人買囉,係咪?但我睇返呢3H.S.I.周線圖,20117月後係跌,但20126月後係升架Bor?『政府都係機構性投資者』我見佢外匯投資等等,啲成績都好似唔錯,但我冇好Detailed咁研究過,淨係睇新聞咋。HeHe!同埋如果政府係跌市前發債,咁就多左錢可以投資,趁跌市賺一筆?^^

Marbo(2013530):「可能係我表達得唔清楚,你諗吓佢係Issuer當然想賣得好,咁股市好嘅時候,啲人又點會買債券呢?2012年由2月一直跌到6月﹔2011年亦係由年初一直跌到6月尾(之後再跌到十月),咁啲人自然裙拉褲甩仆去搶啦!睇電視見到抽中左啲人個樣幾著數呀!I.I.(Institutional Investor)有料到,唔代表佢一定要為『你』賺錢,你眼中嘅『賺錢』亦唔一定係佢嘅最大目的。正如大行出尼講野,唔一定為左你好,唔代表一定要益你,唔好諗多左。只係佢地有佢地算盤,佢地有佢地返工,佢地有佢地職能,你要明白世界點運作。」

晴晴(20130531)︰「嘻嘻!我會唔會想像得呢個世界太美好!^^

Marbo(2013531):「同世界美唔美好無關,呢個係現實,你要看清楚。多認識不同階層朋友,多聆聽各行各業唔同人睇野方法同觀點,你可以更明白別人想法,也補充了自己的。我的說法不是說誰是誰非,而係你要明白不同機構有不同使命,理念亦不一定與你一致,與你不一致亦不代表一定是不好,政府亦有佢嘅立場同思維,我地要去理解,唔應該武斷以己度人,否則只會誤判形勢。」

晴晴(201362)︰「Yes!我都好鍾意聽人講野架!^^特別係年紀比我大嘅人啲經驗同經歷囉︰)。不過有時同啲人唔啱Key就唔傾架啦HeHe。例如我唔睇漫畫個啲,人地同我講One Piece我都只係『哦』,可能等我好得閒或者會睇下嘅。^.^

Marbo(201363):「One PieceOK啦,草帽仔彈弓人嘛!我又唔算好鍾意,但都可以嘅,係一部好有幻想力嘅Adventure卡通(漫畫)。當然啦,『酒逢知己千杯少,話不投機半句多』嘛!係唔係?不過個市就無得啱唔啱Key,佢係一個現象,唔到我地鍾唔鍾意,只可以客觀去分析同認識佢。」

晴晴(201363)︰「哈哈!One Piece,我身邊好多人講,又話好好睇,又話睇到喊。好誇張!聽佢地講呢套野有排做哦。我E+好少睇漫畫、卡通,總係覺得好多時好似好唔真實,同太簡單咁。E+fb都少玩,放工大把野做,得閒都早啲訓好過。fb睇來睇去都係咁,啲人唔係呻就係哂幸福,當然有啲Infofb傳來傳去,我都會8卦吓既。投資我仲係初哥,學習緊客觀啲去睇個市架啦!不過有時睇到悶就搵其他野娛樂下,打發下咁。跑吓步,聽吓歌同音樂,睇啲我鍾意既節目,愈黑暗愈真實愈好,睇下同辦公室政治有關的文章,學吓野,以免俾人擺左上枱都唔知,咁就俾人笑C啦!我想像得世界太美好啦,要睇多啲黑暗面。︰) P.S.︰跑步真係唔可以冇左Music,如果唔係我都唔知點跑落去了。HeHe

Marbo(201364):「咁,我近期鍾意睇魔導少年Fairytail多好多嘞。之前『阿是』有套『戀愛小魔女』都勁好睇,最Like果個做對手嘅女角麻耶,啲金頭髮曲得好靚又有性格,亦正亦邪咁,我個Blog之前都有寫過,HeHeWell,人要不斷學習嘅,高興見到你成長,你係有思考力同鍾意思考嘅人,呢個世界比較少。係呀,跑步無Music真係好悶,其實有我都覺得好悶,最近我嘗試行樓梯,幾好。世界有美好一面,但亦有醜陋一面,唔好偏激,兩者皆在,問題你要識分別同應對。之前講嘅唔係因為啲人唔明白(個市)有幾黑暗,呢個唔係黑唔黑暗嘅問題,而係啲人認識唔夠深入,曲解事實人云亦云嗟。認賊作父,好人當賊亦一樣不分是非,都係錯。」

晴晴(201364)︰「哈哈哈!睇黎你好鍾意睇漫畫同卡通,呢啲等我好得閒或者退左休先睇啦︰P。你會唔會鍾意漫畫同卡通多過電影架?我Like電影多啲呢!我有思考力?真定假架?我好屎架咋。偶像你要多多指教哦!鍾意諗野呢,都認同,好多女仔都鍾意諗野呢!有時諗啲好白痴既野,自己都會忍唔住笑!同埋只要唔係瞓覺,我個腦都諗緊野。有個原則我一定要做到的,就係瞓覺唔諗其他野,只諗周公,所以我睡眠質素好好架!冇失眠,謝天謝地,我愛瞓覺!行樓梯都幾好架!做多啲運動!我覺得做運動可以Keep住自己魄力,同埋我鍾意先苦後甜嘅感覺,流一身汗再去洗白白係好舒服架!我諗緊退休有時間就拜師做氣功呢!身體好緊要!你仲有做啲咩運動架?最後,個市E+好悶局咁,我每日都有睇吓,迫緊自己多思考個市,同唔好信哂啲人講野。學習之中!努力緊!」

Marbo(201364):「電影都一樣鍾意,不過有時某啲片種,造型同拍攝真係真人不如卡通,卡通不如漫畫。例如One Piece如果拍真人真係唔知點搞,但係Ironman又好得喎!總的來說,我係無偏好嘅,效果好就得嘞。我都好鍾意瞓覺架,係保持青春同健康嘅好方法!另外係飲水同沖熱水涼。運動我真係麻麻,嘻嘻,係弱項。我好怕做啲Repetitive嘅動作,例如係跑圈果類,好快會悶。唔,個市唔陰陰下邊夠死得人多呢?比啲耐性啦,我一般每日睇一兩眼就可以,最緊要係With the Market而唔係In the Market。咁,你慢慢就會明白多好多野,同啲大戶想搞邊科。當然,佢地唔一定搞到,所以睇到都要留一手,但你要有所領悟。」

晴晴(201365)︰「飲水同沖熱水涼我都好Like架!夏天好多人沖凍水涼,我真係唔得。我都唔算係Sportive嘅人呢!只係我想Keep Fit同健康啲。游水就夏天先游吓,跑步都係上年先Pick Up咋!我唔係係運動場跑圈,跑圈真係仲悶。我揀啲有得睇風景嘅地方跑。另外,都做左幾年Yoga^^個市呀都幾悶架,今日都係得閒先望到兩眼,With the Market呢!識得啲人玩期指,WOW,聽完好似坐過山車咁,真係大起大落架!心血少啲都唔得。有時可以羸(筆者按︰輸)到咁多錢,都要條命受得起,我好信架。哈哈!」

Marbo(201366):「沖凍水涼,太激啦,唔掂囉!期指?我未識過人真係玩期指同衍生工具發達嘅。輸輸贏贏就多,破產或者輸到怕嘅就識唔少。我都明白箇中心理,事實上知道會點心郁郁法。你知啦,懶識睇市又成日中果啲『叻仔』嘛!一野就『羸到咁多錢』,過大海仲快啦!賭仔講贏唔講輸,你都唔好咁天真。哈哈,非禮莫言非禮莫視,時運高唔聽鬼叫,最好架嘞!」

晴晴(201366) ︰「有時好多生意人為左錢冇左良心,好多人好功利,唔理其他人死活,世界變了!琴日啲牛牛俾車撞C,好可憐呀!睇到眼濕濕。我都唔明點解可以咁殘忍架!野食真係冇計,自己煮係最好。期指我都唔敢玩︰PMarbo對發達既定義係咩哦?幾多錢或者係達到點樣的生活質素先叫發達哦?咁你見識啲人係點發達呢?係咪有故仔聽哦???」

Marbo(201366)︰「『有時好多生意人為左錢冇左良心,好多人好功利,唔理其他人的死活』簡稱為『唯利是圖』。『牛牛事件』我都好傷心!君子不近廚,是說即使為了生存殺生也不願去多看,也就是勸人有慈悲心。發達?對我來說是『為世界造出重大貢獻』,貢獻不一定是甚麼豐功偉業,平常如父母親養育子女成才,社會上人人各施其職,安守本份,本身已是一件偉大的事。錢要越多,代表越貪心。如果不知足,係幾多都唔夠嘅。如果知足,亦唔係需要好多,條數好易計。理財有道,錢係可以生錢嘅,明唔明?至於能生多少,就是各人的努力了。

有錢人我都識啲嘅,都算見識過唔少野。大概可以分為有文化同無文化,暴發同世襲,白手興家同一世夠運幾大類咁啦。總的來說,各有前因莫羨人。不過,如果只係用錢去滿足自己慾望,又有咩咁特別呢?我會比較欣賞德蘭修女喎!遠嘅亦有釋迦牟尼、莊子、孔子、孟子......不過咁,我只係『閒雲野鶴』,對我來說,作一首傑作時就好似擁有了世上最好的了。哈哈,你都知呢條友傻架啦!」

晴晴(2013067)︰「哈哈哈,咁又唔駛唔煮飯嘅。儘量唔好係自己面前殺活生生嘅野囉!食齋或食多啲蔬果都好正架!當然啦,錢從來唔會有人嫌多既,知足都好重要啦。我只想財務自由咋!唔使為生計而返工,做自己想做野。理論上,我唔大駛,應該可以做到的。要幾耐呢?就話唔埋,每日個腦都計緊,HeHe

係架!我對動物特別有感覺,會感覺到牠們的痛,會很同情牠們。現在電視做的一個北極另一個是沙漠的馬拉松,就正正提醒人類了。當我們一開水喉就有水用的時候,沙漠居民可能已經渴了很久;當我們夏天的時候在涼冷氣的時候,北極熊的家正在縮小,看了很感觸,很傷心,很想哭。看著地球上的物種慢慢的瀕臨絕種,慢慢消失,這是很可悲的。香港人太幸福,太不知足了!

我到現在睡覺的都不用開冷氣的,心靜自然涼,一點汗都沒有,不要浪費資源;電話未壞,銀包未爛我都唔捨得換新的;天氣好,不乘車,走點路,出點汗,做點運動,對身體好^^。不過,香港到現在還有很窮的人,每次看見都提醒我要善用金錢,更要多幫助人。但願所有人都學會『珍惜』。我太渺小了,沒甚麼影響力,就由自己做起。

有時候,可能我想的都是人性好的一面,世界好的一面,對外界的戒心、猜疑亦少了。每一天我都是笑的,跟每個人說話,認識的不認識的,不分階級職位,都會微笑。很多人說我笑容很多,Full of Positive Energy,但如果是不如意的時候,可以給點臉色人看,就別笑了。哈哈哈!我是有點窮,勝在心靈很富有哦!」

Marbo(201368):「關於如何可以財務自由,坊間的財務策劃只是一個原則,部份亦有誇大之嫌,不是人人按著一大堆財務公式搬字過紙就適合。你有空可以去看一看我的財務自由文章,可能幫到你的。

你有善心亦有反省之心,已是很難得,本身已是一種福,由自己做起亦已是一種功德,功德本身沒有大小多寡之分。大小多寡是人自己付予上去的,這是虛無,也是色,即是空也。呀,最後人人都是『錢在銀行,人在天堂(地獄)』,名利物慾可以有可以追求,人之所以為人也,但不必執著,得失也不要介懷太多。理財可以看成是一條修煉之路,也可以是通過投資去明白道理,辨別是非,成敗得失是一個過程。因為錢是最令人表露本性的,你有一天能駕馭金錢慾望(貪婪與恐懼)就已算是真正成功了!我都常反省自己,甚覺有不少不善之處,所說的只是一個體驗,從來不敢以為做到了甚麼,也有困惑之時,行文只是為有緣人共勉者也。

人能夠開懷待人,事事正面當然是好事,值得學習。但這與看清世情,人性善惡是不抵觸的,不是因知道有壞人或者有人佛口蛇心對你,就代表世界是醜惡。正如森林中有毒蛇猛獸,亦有鳥語花香,你只要清醒懂得分辨是非黑白,審時度勢善法而行就好了。與其做一隻披上狼皮的羊,不如做隻有禮善良的獅子,獅子沒事是不用張牙舞爪的。」

晴晴︰「你說的正是佛經中《心經》的『色即是空,空即是色』。正因為一些自己的原則,有些工作或公司我是不會做的。哈哈哈!」

Marbo︰「物本無相,出處哪裡不重要,最重要你明白箇中道理然後去實行。世事萬物本無一物,都是源於虛無歸於虛無,虛無本身就是虛無又怎可以說明呢?這不是說不要努力或者消極,而是要醒悟生命的意義。生之為人就努力為人,好好善用今生,你能夠堅守人世為善原則去做事,君子取之有道,擇善固執,那是最好不過的事啊!既然明白了一切最後也是歸於虛無,都只是一個過程,根本就沒有擁有甚麼,那又為何要被名利控制,甚至因此去做違背天道良心的事呢?人,如果只是唯利是圖,那除了是金錢奴隸之外,還有甚麼意義呢?當然,我只是普通人也常有犯錯被惑之時,只是時刻以此警惕自己吧!」

本文插圖︰華貴琳「美人魚」Wequelin ’Mermaid’, Wikimedia Commons

免責聲明︰本文乃作者個人心得,未經嚴謹學術及大量數據驗證,只可作參考,亦不可視作任何投資方法或建議,當中亦可能出現計算上的誤差,極端例子及立論的粗疏而有所偏差,請以獨立思考判斷之,本部落絕對反對高風險投機及短線投資,例如是窩輪,期指,期權,槓桿,短線買賣等等,本人之看法絕不適用!所有內容亦只是推測,只供參考,不可盡信!  本網站包含的內容和信息乃根據公開資料分析和演釋,該公開資料,乃從相信屬可靠之來源搜集,這些分析和信息並未經獨立核實和本人並不保證他們的準確性、完整性、實時性或者正確性。在本網站的行情價格、圖、評論和購買或者出售評分應該謹慎作為僅參考使用,本人不應被視為游說任何訂戶或訪客執行任何交易,您須為所有跟隨在本網站的評論和購買或出售評分執行的交易負責。本人之文章純熟個人意見並沒有邀請或遊說任何人作出任何投資或買賣決定,對任何資料提供及網站的信息和內容如有更改恕不另行通知。本人有權但無此義務,改善或更正在本網站的任何部分之錯誤或疏失。用戶在沒有本人明確的書面同意情況下,不得以任何方式複製、傳播、出售、出版、廣播、公佈、傳遞資訊內容或者利用在本網站的信息和內容作商業用途。投資股票和其它有價證券附帶風險,本人鼓勵您使用有效的風險管理和教育工具,但本人不能並不會保證任何在本網站現在或未來的購買或出售評論和訊息會否帶來贏利。過往之表現不一定反映未來之表現,本人不可能作出該保證及用戶不應該作出該假設。本人也許連結訂戶或訪客至其有興趣的網站,但本人只提供此服務給訂戶或訪客並不為此安排負責。本人對於任何包含於、經由、連結、下載或從任何與本網站有關服務所獲得之資訊、內容或廣告,不聲明或保證其內容之正確性或可靠性。對於您透過本網站上之廣告、資訊或要約而展示、購買或取得之任何產品、資訊資料,本人亦不負品質保證之責任。本文的中英原文如有任何岐異,一切以中文原文為準。 
Marbo,三柱投資法,投資理財,歐債危機,牛市熊市,美債危機鬧劇,歐美經濟對中國影響,廿一世紀三國時代,歐債危機,供求曲線之投資應用,成交量的啟示,美國財技OT,QE3,笑說樓價,QE4,財政懸崖,限漲令,樓價