Marbo原創漫畫及故事2011年原載於隨意窩，但因隨意窩於2023年8月31日後不再營運，現轉載於此，圖片文章原發表日期時間如下：
201101070938蜜瓜星雲歷險記(1):
蜜瓜星人KUBI
475我的傻瓜漫畫
蜜瓜仔
KUBI
有一日，Marbo係超級市場見倒個蜜瓜，覺得佢好Cutie，結果望吓望吓，又覺得佢好似好可憐咁，孤伶伶一隻瓜被人求求奇奇咁擺左係個爛鬼箱上面，迷一手捧住佢，比錢買左返屋企囉，不過佢個樣咁得意，真係同平時見啲蜜瓜唔同呢，唔知點講，總之，講圓佢又好似冇人地咁圓，講重佢又好似重得濟，頭頂條Ｔ字又好似硬得濟，總之就係奇奇怪怪.....驚住佢變壞，先用清水好小心用牙刷仔清潔，再用條好柔軟嘅白毛巾幫佢抹乾淨，放左入去個雪櫃有LED燈果格．比啲光合作用條件佢，等佢瞓得舒服啲!
^^
蜜瓜仔,係大大雪櫃瞓,又舒服又安全!
半夜，聽到廚房有啲聲，迷起身走去睇吓，又冇野喎，諗起個蜜瓜仔，有啲唔放心，打開個雪櫃，點知就見倒隻蜜瓜仔變左卡通身，仲同自己講野！
哇！發夢定係思覺失調呀，聽日重要返工架，大佬！米玩啦！
蜜瓜仔好友善，佢即刻解釋話Marbo冇事，佢係來自蜜瓜星嘅蜜瓜星人，叫做’KUBI’！因為執行宇宙巡邏任務發生左意外，緊急降落地球，不過地球人當左佢係生果，佢又唔敢隨便變身，結果比人賣左落超級市場，好彩遇倒Marbo，睇得出佢唔係一般嘅地球人，咪用第六通訊頻道向佢求援.....就係咁，Marbo間屋仔又住左隻叫做KUBI嘅蜜瓜星人勒！
本故事純屬虛構，如有雷同實屬巧合
201101090657蜜瓜星雲歷險記(2):
二次元屋
159我的傻瓜漫畫
蜜瓜仔KUBI自從來左Marbo屋企，就將佢屋企個雪櫃改造成二次元空間出入口……一日，Marbo放工返屋企，打開個雪櫃想攞野飲……
Marbo:「哇！KUBI，乜將我個雪櫃搞成咁呀！」
KUBI:「幾好丫，地方見洗左好多喎！」
Marbo:「咁我啲野食呢？」
KUBI:「啊，你行入尼迷攞倒囉！」
Marbo:「行入尼？」。Marbo未講完就被蜜瓜仔KUBI一野扯左入去，只見裡面係一間大到講野行路都有回音嘅超級豪宅！
KUBI:「隨便坐啦，當係自己屋企得架啦！我同你咁Friend，冇計嘅！KUBIKUBI……」
Marbo:「地方好闊落喎！」Marbo自問都見識唔少，頭鱷鱷四圍望，都被佢大倒吓……偏廳都有籃球場咁大，仲係大圓落地玻璃窗270度Panorama
View，啊，後面果個唔係Manhanttan
City？現場實景尼喎，唔通自己一入雪櫃就去左New
York！
KUBI:「個景點呀？Marbo主人！」
Marbo:「主人？你唔係我工人喎！」
KUBI:「我查過啦，你地香港人凡係果啲係外地來，唔係親戚又唔係男女朋友，長期係自己屋企住嘅，都叫你地做Master架啦，Master唔係主人唔通係碩士咩！」
Marbo:「果啲係外籍家庭傭工，俗稱菲傭、印傭……」
KUBI:「哦！咁複雜，KUBIKUBI……是但啦，都係一句嗟，Master！」
Marbo:「……」x﹏x
KUBI:「飲咩呀？Marbo主人！」
Marbo:「哦，水得啦！唔該。」
KUBI一邊遞左杯用水晶玻璃杯裝住嘅「有氣」San
Pellegrino，一邊開左罐汽水攤左係張桃紅色法國式長梳化上面。
Marbo睇真啲，哦！佢罐可口可樂同自己杯礦泉水，唔係自己尋日買番尼果啲？哇！果啲迷係我買嘅法國大生蠔，乜得番啲穀咋！
本故事純屬虛構，如有雷同實屬巧合
201101101329蜜瓜星雲歷險記(3)
:KUBI去左邊?
141我的傻瓜漫畫
話說啊Marbo收留左隻蜜瓜星人KUBI仔，佢個雪櫃就被人佔用左，成為左一個二次元空間嘅出入口，跟住啲明貴法國諾曼第生蠔，以至支Krug香檳同啲可口可樂，又被KUBI仔一野食哂，冇計啦，唯有買番個細啲嘅雪櫃用啦，你知啦，香港地地方淺窄，個新雪櫃都唔知放係邊，唯有買個樣靚啲嘅擺係廳啦，好似以前住廉租屋咁囉，不過呢到係......
算啦，都唔可以下下去攞野噪住隻KUBI仔嘅。
今日放工早啲返屋企，買野都要預多一份，唔知KUBI仔啱食啲乜喎，佢來左地球冇耐，都唔知架，每樣預啲比佢啦．Marbo大包細包捧左入屋，都幾狼狽吓，牛高馬大大男人又成個師奶仔咁，佢好有條理將啲野食分好兩份，一份自己一份KUBI仔，諗住敲門攞入去，點知佢一打開個雪櫃門，就聽倒一段蜜瓜仔嘅錄音，同見到張相：
「Marbo主人，你個雪櫃唔係幾夠凍，我去左「二次元」瑞士涼吓頂一頂先......呀，你有野食就擺係我偏廳轉左再轉右再轉左再轉右直行最尾倒數第三個門後面右邊轉角果間，成間都係黃色嘅，就係廚房勒，裡面有個仿地球果個紅色罐外型，寫住Coca
Cola嘅蜜瓜星雪櫃，你出聲佢就會幫你放好哂架啦！^^唔，你上次果啲圓圓地，白雪雪滑滑，黏住個好鬼硬又界手又凹凸不平嘅殼，食落鮮嫩，清甜得尼又有啲海水味嘅野食，呀，都幾ok喎，可惜少啲嗟，下次多啲都仲得架！呀！仲有果支淡黃色液體，都過得去，講時講，我食野係唔係好隨便呢，啲粗野都唔會話食唔慣架！呀，唔講啦，趕住去下一站，車唔等人架......喂喂喂等埋.......」
咁都得！！！Ｘ﹏Ｘ
本故事純屬虛構，如有雷同實屬巧合
201101102207蜜瓜星雲歷險記(4)
:KUBI有個可樂雪櫃
159我的傻瓜漫畫
咁，果個被人叫做「Master」嘅Marbo，迷唯有死死地氣攞住一袋二袋食物入去比KUBI仔囉，佢經由廚房個雪櫃門入左去KUBI仔個「二次元空間」豪宅，跟住佢之前嘅指示，行到氣咳咁濟，終於見倒個黃色嘅房，係個落地玻璃門裝入去，睇落都有成間細間嘅「大乜鑊」快餐店咁上下大，不過就一個人都冇，仲有一個無敵大海景！唉，好似係夏威夷Waikiki喎，呀唔係播，冇咁少人架，仲唔見果間希爾頓酒店喎？呀，係馬爾黛夫先啱！
佢一推開門入去，左邊牆就真係見倒個好似人咁高嘅「可樂」造型雪櫃，於是迷照指示打開道雪櫃門囉，點知唔打由是可，一打開即刻嚇窒左！係個雪櫃裡面竟然跳左另一隻KUBI仔出尼！ 不過，尼隻KUBI仔睇真啲又有啲唔同，背脊後面多左一對白色嘅翼，頭上面又有個白色嘅光環，好似人地畫卡通果啲天使咁！
有翼KUBI仔:「呀！晚安！你梗係啊KUBI主人講嘅Marbo主人勒！」
Marbo冷靜落尼:「係呀，乜你唔係KUBI咩？」
有翼KUBI仔:「唔係，我係『有翼KUBI仔』，全名叫KUBI-BIBIBA，簡單啲可以叫BIBIBA，係KUBI主人嘅分身僕人。」
Marbo:「分身僕人？」
有翼KUBI仔:「係呀，係蜜瓜星，係貴族都有分身僕人嘅！」
Marbo:「哦！即係我地啲家庭傭工果類，係唔係？」
有翼KUBI仔:「差唔多啦，不過根據我地資料顯示，你地啲家庭傭工可以唔做，放假同埋有錢收嘅，我地就冇啦。」
Marbo:「咁都得？迷好似做奴隸？」
有翼KUBI仔:「又唔係，因為我地係分身尼加嘛，唔通左手打右手咩！」
Marbo:「都係唔係好明，不過是但啦！呀，BIBIBA啊可，呢啲野食係比KUBI仔嘅，我驚住佢餓親，特登買比佢，點知佢「瓜影」都唔見，原來去左瑞士滑雪！」
有翼KUBI仔:「唔好意思，佢係咁架啦，成世蜜瓜都係咁無分寸，話做就做，一有得玩就成隻蜜瓜巔哂！Marbo主人，啲野係放低得啦，我地識搞架勒！」
Marbo:「咁好啦，你要小心啲野食過期，同埋要煮熟啲呀！」
有翼KUBI仔:「Marbo主人，你真係好人勒，唔知我可唔可以去你屋企坐吓呢？」
Marbo:「可以，隨時歡迎！不過我間屋可能仲細過你地個廁所！」
有翼KUBI仔:「唔緊要，過門都係客，禮尚往來呀嘛！」
Marbo笑左一笑，雖然仲係唔明發生咩事，不過眼見隻「有翼KUBI仔」，叫咩BIBIBA話，好明顯係知書達禮果隻，同KUBI仔好似天壤之別，心諗都冇乜問題掛，迷比佢飛吓飛吓咁跟左返屋企囉！
點知……
本故事純屬虛構，如有雷同實屬巧合
201101120055蜜瓜星雲歷險記(5)
KUBI係超人老友！
131我的傻瓜漫畫
尼集講到，啊Marbo
攞完啲野食比KUBI
仔，係佢個「二次元」豪宅識左佢隻分身僕人「有翼KUBI」－BIBIBA， BIBIBA係一隻有翼同光環嘅KUBI仔，隋左外型有分別外，仲明顯係好有教養同好有禮貌，原完唔似隻蒸生瓜KUBI仔咁，BIBIBA好客氣，係都要去Marbo
屋企探吓佢，咁就跟左Marbo
返屋企勒，點知佢一踏出Marbo
屋企個雪櫃門，就見倒......
BIBIBA:「哇！乜你都識「M78星雲」啲宇宙人架？」
Marbo：「吓？你講果啲咸蛋超人？乜你都識嘅咩？」
BIBIBA:「好熟添，咁你呢？」
Marbo：「梗係！細細個已經睇架啦！地球好多小朋友都有睇架！」
BIBIBA:「睇？」
Marbo：「係呀，咸蛋超人電視劇集或者大電影一向都好愛歡迎架，乜連蜜瓜星都有得播嘅咩？咁門谷迷好勁？」
BIBIBA:「電影？梗係唔係啦，我地係老友尼架，上個禮拜先至同「超人太郎」同埋「巴魯坦星人」去完街買野！」
Marbo：「吓？同「超人太郎」同埋「巴魯坦星人」去完街買野？咁都得！」
BIBIBA:「係呀，宇宙人一齊Shopping，好平常嗟！」
Marbo：「乜「超人太郎」唔係「巴魯坦星人」嘅死敵尼嘅咩？點會去街買野？」
BIBIBA:「哎呀！乜你咁大個人咁冇Sense屎架，你地地球人都有好人同壞人啦，「超人太郎」打果隻係「巴魯坦星」壞人，佢幫人地清理門戶，係「巴魯坦星」都係英雄尼架，梗係有「巴魯坦星」好人朋友啦！」
Marbo：「哦，咁「幪面超人」呢？你又識唔識？」
BIBIBA:「幪面超人？你講邊隻呀？」
Marbo：「迷係放係「超人太郎」下面果層果一排囉。」
BIBIBA:「哦，有對好大隻電燈眼果隻呀？佢地係地球改造人，唔係宇宙人喎，梗係唔識啦，乜你啲Concept咁亂架！睇你考「宇宙人常識科」實肥佬啦！」
＞０＜
真係咁都得！
本故事純屬虛構，如有雷同實屬巧合
201101160108蜜瓜星雲歷險記(6)
:低智慧宇宙生物
192我的傻瓜漫畫
KUBI - Wall Paper
Marbo諗諗吓越來越唔明，對KUBI仔啲野真係好好奇，咁就問起BIBIBA啦。
Marbo:「啊BIBIBA，講開又講，我有啲野真係好唔明……」
BIBIBA:「乜野呢，Marbo主人？」
Marbo:「唔，既然啊KUBI仔可以係二次元世界走來走去，佢就唔洗被人賣落超級市場啦，洗乜等我去救呢？」
BIBIBA:「Marbo主人，呢個世界唔係乜都可以解釋倒嘅，係唔係？而且外星人有外星人嘅世界，你地啲地球人智慧又有限，有時都唔知點先至可以講得明比你聽，不過我都會試吓嘅。」
Marbo:「唔。」
BIBIBA:「根據當日嘅紀錄，KUBI主人架飛船發生左意外，被迫緊急降落地球，不過以我地蜜瓜星嘅偵測系統資料顯示，地球係一個污染相當嚴重嘅星球，而且地球人有食蜜瓜嘅不良習俗，KUBI主人又受左傷，太空船就自動開動左防衛系統，將KUBI主人嘅外殼變成最堅硬嘅蜜瓜設定，可以刀槍不入，你果日第一次見倒果個怪怪地嘅蜜瓜樣，就係佢嘅保護模式啦。」
Marbo:「哦！唔怪得KUBI仔而家咁皮光肉滑一啲皺紋都冇啦，原來果日係蜜瓜保護模式！」
BIBIBA:「不過，當佢進入左保護模式，就用唔倒二次元功能，本來諗住養好傷先，點知又唔好彩被人發現左，仲執左去超級市場，正在徬徨緊嘅時候，就見倒Marbo主人，我地蜜瓜星雲裡面嘅宇宙人個個都有強烈第六感，可以準確感應到一啲『低智慧宇宙生物』嘅善惡程度，你係佢係地球上碰到善良程度好高嘅『低智慧宇宙生物』，迷試吓用第六通訊頻道向你求救囉，點知你果然收倒！」
Marbo:「哦，原來我地係『低智慧宇宙生物』！」
BIBIBA:「我冇話你地，我係話你嗟！」
Marbo:「吓……」x﹏x
BIBIBA:「唔好唔開心，低智慧唔係壞事，知少啲迷煩少啲囉，你睇吓啲貓貓狗狗開心過你地幾多？起碼唔洗搵錢供樓同返工考試啦！所以低智慧唔係踩你架！」
Marbo:「咁又係……」(謝左)
BIBIBA:「雖然係咁，不過你都蠢唔哂，仲做啱左，你識得將KUBI主人放入光源，比佢進行光合作用，又識得比佢留係好安全嘅地方，佢先可以復原得咁快，而且你個雪櫃又真係好啱用，佢先可以因地制宜將佢改造成二次元入口嗟！」
Marbo:「咁，佢又唔即刻返去蜜瓜星？」
BIBIBA:「咁，我又唔知KUBI主人有乜打算喎！」
Marbo:「咁，佢又點有錢去瑞士？去到又唔怕被人發現？」
BIBIBA:「有啲野真係唔係你嘅智慧可以明白嘅！拿，佢由二次元世界出發，梗系去左二次元嘅地球啦！二次元嘅地球包括左你地叫瑞士果個地方，係有各式各樣宇宙人生活嘅，你地地球人反而係小數民族喎，咁果度又梗係唔係用你地所謂嘅錢架啦！」
Marbo:「係喎！」
Marbo真係有啲恍然大悟，雖然知道自己原來係『低智慧宇宙生物』有啲唔開心，不過諗吓天下之大，人類又點解要咁自大成日以為自己係「萬物之靈」呢？況且，BIBIBA都只係話Marbo係嗟，冇話全人類都係喎，咁Marbo的確唔係好高智慧嘅人，都好合理呀！
本故事純屬虛構，如有雷同實屬巧合
201101171303蜜瓜星雲歷險記(7)
:菠蘿冰大帝「叉叉燒」
216我的傻瓜漫畫
Marbo諗一諗又覺得BIBIBA講得好有道理，宇宙咁大又有乜可能淨係得人類呢？人類又有乜可能一定係最叻果隻嗟，學啊偉大科學家「霍金」Stephen
Hawking話齋，人類真係唔好咁幼稚，成日走去招惹啲外太空生物，以為所有外星人都係唔夠自己厲害，一陣惹埋哂啲又邪惡又有超高科技嘅，咁就分分鐘被人一鋪清袋啦！係咁，外星人自己搵上門滅絕人類就話嗟，人類自己千辛萬苦出錢出力出時間去招惹人返來殺自己，係唔係真係有啲捉蟲呢？
Marbo:「啊BIBIBA，其實諗落我都算好彩嘅，遇倒你同KUBI仔，起碼你地都係善良嘅外星人呀！」
BIBIBA:「咁又係，KUBI主人雖然係你地眼中可能係貪玩啲，不過玩係蜜瓜星人嘅天性，我地都係做自己嗟，我地夠唔明點解你地咁鐘意搵錢咯！」
Marbo:「係呀，其實有時我地都唔係好明架！不過講開又講，既然你地認為我係『低智慧宇宙生物』，咁要你地成日叫我做主人唔係好委屈咩？」
BIBIBA:「啊，無所謂嘅，可能你地低智慧所以先有咁嘅問題嗟。拿，你地啲老闆唔通個個都叻過班伙計嘅咩？你地迷一樣好順口咁叫人做老細？行入茶餐廳，女嘅係人都叫靚女，咁唁通啲伙計又覺得好委屈咩！有錢佬都唔一定係最叻果個，更加唔一定係好人，咁唔通你地又條氣唔順囉喎？」
Marbo:「咁又係喎！」++
Marbo真係越來越覺得蜜瓜星人叻，心裡面又好開心，可以認識倒啲咁有智慧嘅朋友，正係呢個時候，廚房個雪櫃又傳出左啲怪聲，Marbo正想走入去睇吓，點知都未入到去，就見倒一隻好似菠蘿嘅生物走左出來！果隻菠蘿生物外表好得意，成隻鮮黃色，頭頂豎起四塊好似皇冠嘅綠葉，兩隻眼下角呈外三角形，四隻手兩隻腳，下半身一格深黃一格淺藍，好似著左件英國紳士格仔毛衣，只見佢個樣好似好焦急咁，走來走去唔知搵緊乜野……
BIBIBA:「啊！菠蘿冰大帝CHACHASIU，乜咁錯盪呀！」
CHACHASIU:「唉，你唔係BIBIBA？乜你會係度嘅？」
BIBIBA:「係呀，咁你呢？」
CHACHASIU:「我係二次元撞倒啊KUBI，佢就指左我來呢到，話有隻叫做Marbo嘅宇宙人好得意喎！呀，係啦，你隔離果隻好得意嘅『宇宙怪獸』係咩野呢？」
BIBIBA:「噢！佢迷係地球宇宙人Marbo囉！Marbo主人，呢位就係『蜜瓜星雲』裡面其中一個叫做『菠蘿星』第十七惑星嘅『菠蘿冰大帝』CHACHASIU！」
CHACHASIU:「啊！乜你就係『宇宙人Marbo』拿，你好呀！你都幾得意喎！」
Marbo:「啊！你好呀，菠蘿冰大帝『叉叉燒』！？」
CHACHASIU:「係CHACHASIU，唔係『叉叉燒』！」
Marbo:「啊！對唔住，係CHACHASIU。」
就係咁，一隻好得意嘅「菠蘿星人」又做左「地球宇宙人Marbo」嘅朋友Lu！
本故事純屬虛構，如有雷同實屬巧合
201101190045蜜瓜星雲歷險記:KUBI
- WALL PAPER (1)
94我的傻瓜漫畫
No Commerial Use
All rights reserved
201101200034蜜瓜星雲歷險記(8)
:宇宙飛天香蕉
121我的傻瓜漫畫
講番KUBI仔，原來佢係瑞士正想離開嘅時候，遇上左雪崩，一大堆雪由山頂滾落尼，好似啲溶左嘅雪糕照頭淋咁，好彩佢夠機警，又有高超嘅滑雪技術，識得及時避開一劫，十足十占士邦咁型！不過雖然冇事，但因為交通網絡已被嚴重破壞，最後都係要勞煩佢老友，宇宙巡邏隊嘅救援隊長，香蕉星人「燒燒叉」SIUSIUCHA及時派出「宇宙飛天香蕉」來打救佢走人啦！「宇宙飛天香蕉」係蜜瓜星雲裡面第二十一惑星「香蕉星」最優秀嘅拯救飛行機械人，有自我意識，不經人手，可以講係另類生物，而今次出動嘅就更加係鼎鼎大名嘅「橙色中隊」！
「橙色中隊」有一架全蜜瓜星雲出哂名嘅「飛天皇帝蕉」，機身一律橙色，頭尾戴上鮮黃色「風紀帶」，佢可以用「瞬間轉移」係極快時間縱橫時空，抵達二次元現場，進行拯救行動。咁樣轉眼間，蜜瓜星人KUBI仔又啫一聲返左來地球嘅現實世界，仲係著名嘅香港葵涌貨櫃馬頭上空飛左一個大圈，表面話係順便瞭解一下啊Marbo個城市喎，實際迷又係得「貪玩」兩個大字！
當然啦，好似「視覺屏蔽」啲咁基本嘅科技，就梗係一早就用左啦！你知啦，一陣玩得大開心，一時唔小心被其他啲低智慧宇宙人發覺倒，又唔知佢地有冇啊Marbo咁善良喎，到時被啲娛記大造文章，又採訪又專題討論咁揚，就唔係咁好啦！KUBI仔一向咁都低調，係唔係？
本故事純屬虛構，如有雷同實屬巧合
201101201944蜜瓜星雲歷險記(9)
:傾傾蕉
126我的傻瓜漫畫
就係咁，Marbo屋企突然之間變成左外星人嘅二次元出入口，當然道門就開係佢廚房個雪櫃度啦！Marbo同BIBIBA仲有「菠蘿冰大帝」叉叉燒，就係個廳度傾計……啊！唔係「叉叉燒」，係CHACHASIU先啱，是但啦，都係一句嗟，學佢話齋:「名尼嘅嗟！」。
就係呢個時候，Marbo突然係個窗外面見倒有隻好似巨型香蕉咁嘅橙色野飛埋尼！哇！真係嚇左一跳！弊勒，隻香蕉成隻撞緊入尼啦！Marbo好機警，即刻攬住BIBIBA同隻「菠蘿冰」一跳就跳左入去廚房裡面，仲順腳一野踢埋道門關埋門，真係唔係咁危急都唔知自己身手咁好！
正所謂:「唔撞鬼點算時運高，唔危急點知身手好」！
佢諗跟住一定係轟隆一聲，然後大爆炸，跟住就現場一遍火海，煙霧迷漫，非常混亂，正在好冷靜咁準備即刻打開個雪櫃門，帶埋隻「蜜瓜」同「菠蘿」走入去「二次元世界」避險！不過，好奇怪，佢只係見倒BIBIBA同「叉叉燒」係度捧腹大笑，仲笑到卡卡聲停唔倒口喎！
Marbo:「你地冇事丫嘛？我地要即刻返去二次元避一避呀！」
BIBIBA:「梗係冇事啦！你做乜野咁激呀，玩占士邦呀？」
Marbo:「唔係，乜你地睇唔倒有隻橙色大香蕉撞埋尼咩？」
叉叉燒:「哦，你話啊KING-KING-JIU吓話？佢迷係出面，成隻坐左係張梳化度囉！」
Marbo:「傾傾朝？」
BIBIBA:「係KING-KING-JIU，即係『蜜瓜星雲』裡面第二十一惑星『香蕉星』最優秀嘅拯救飛行機械人『宇宙飛天香蕉』鼎鼎大名嘅『橙色中隊』裡面出哂名嘅『飛天皇帝蕉』。」
Marbo:「……哇！完全Follow唔倒！」
叉叉燒:「唔急唔急，啊Marbo，你睇吓出面先啦！」
Marbo半信半疑，不過出面又真係好平靜喎，照計如果隻大香蕉撞埋尼，要爆都晨早爆左啦！唔通真係好似佢地講，咩KING咩『飛天』咩『皇帝蕉』咩囉？佢鼓起勇氣伸個豬頭出去裝吓，又真係乜事都冇發生喎！
Marbo/ Mapochi
ORIGINAL STORY DRAWINGS BY MAPOCHI, ALL RIGHTS RESERVED
本故事純屬虛構，如有雷同實屬巧合
201101211821蜜瓜星雲歷險記KUBI
- WALL PAPER (2)
93我的傻瓜漫畫
No Commerial Use
All rights reserved
201101300152蜜瓜星雲歷險記(10):
比我？反左面啦!
111我的傻瓜漫畫
Marbo行左出去廳，真係見倒有隻「橙色大香蕉」同個「蜜瓜」好開心咁坐左係張長梳化上面，笑到卡卡聲，隻「蜜瓜」唔洗講都知道係啊KUBI仔啦！佢氣息唔錯，成隻瓜好青綠，又有光澤，即係容光煥發啦！果隻「橙色大香蕉」，頭尾尖端都有三塊好似直昇機葉，又或者係「紅印第安人」頭上綁住嘅大羽毛，不過就「Dub-Dub地」咁係個頭尾上面搖下搖下，一對又大又圓嘅眼睛，卜卜地，一個大笑嘴成日用對手攬住個肥肚腩，好似好Cutie又好善良咁喎！
不過呀Marbo就唔係幾明，頭先明明見倒果隻「橙色大香蕉」係窗外面飛撞埋來，點解個廳同啲窗一啲事都冇嘅呢？仲有，之前果隻「橙色大香蕉」明明成隻直昇機咁大隻，點解而家又可以變細到可以坐左係張梳化度嘅呢？Marbo呢幾日學左唔少外星人知識，都比以前快接受倒啲古靈精怪野架啦，不過呢鋪真係好諗唔掂喎！就係佢百思不得其解嘅時候，一把好得意又幾熟悉嘅卡通聲就對佢講……
KUBI:「Marbo主人，你快啲過尼，等我介紹我地『香蕉星』嘅特產比你識！」
Marbo:「吓？『香蕉星』？乜你唔係『蜜瓜星人』咩！」
KUBI:「哎呀！Marbo主人，『香蕉星』係『蜜瓜星雲』裡面第二十一號惑星。乜你唔知嘅咩？」
Marbo:「我梗係唔識啦，股票21號係咩我就識！」
KUBI:「係喎，我唔記得左你係『低智慧宇宙生物』添……呀，唔緊要啦，慢慢尼啦！」
Marbo:「……」(X﹏X)
KUBI:「嘻嘻嘻！迷冇癮啦，都話左『低智慧宇宙生物』只係一種宇宙生物類別，名尼嘅嗟！」
Marbo:「咁不如叫『超高智慧宇宙生物』啦！」
KUBI:「又得，不過『超高智慧宇宙生物』係貶意尼個喎，你唔介意咩？」
Marbo:「貶意？」
KUBI:「係呀，係『蜜瓜星雲』裡面，『瞓』、『食』、『玩』係最受人尊敬嘅，『超智慧』、『高智慧』係好多好多年前，類似你地果啲咩『石器時代』做奴隸果啲野尼個喎！奴隸一早已經係『蜜瓜星雲』廢除左Lu!」
Marbo:「咁都得！」
KUBI:「不過，我都明白啲個星球都好落後，仲係『野蠻人時代』，而且仲好似係實行緊奴隸制度！」
Marbo:「奴隸制度？我地都冇喎，犯法架！」
KUBI:「咩冇呀，唔通你地日日返工搵錢供樓買乜買物，真係個個都係真心鍾意為左搵錢返工嘅咩？」
Marbo:「冇錢？食風咩！」
KUBI:「我唔係同你講食乜，我係同你講『真心鍾意日日為左搵錢返工』。即係咁，就住你程度咁講，如果真係唔憂食、唔憂住、唔憂著、洗極都有嘅，咁又係唔係個個都『真心鍾意日日為左搵錢返工』，好有樂趣咁呢？」
Marbo:「咁，我諗好多人都唔會啦！」
KUBI:「拿，又好似你地啲小朋友，係唔係個個都『真心鍾意日日返學做功課考試』呢？如果唔係，點解佢地成日都做唔停嘅？」
Marbo:「哎，都係為左將來搵食咯！」
KUBI:「迷係囉，即係地球人係在一種叫做『金錢』嘅奴隸制度之下生活嘅奴隸囉！係唔係？」
Marbo:「唔……」
KUBI:「咁，唔計啲例外情況，你地係唔係一般尼講，智慧高啲就搵錢多啲架？」
Marbo:「可以咁講。」
KUBI:「咁即係更適合做『金錢奴隸』啦！」
Marbo:「弊在冇錢重『奴隸』呀！」
KUBI:「咁即係全部都係『奴隸』啦！不過我係講緊『更適合做金錢奴隸』喎！係唔係？」
Marbo:「……」
KUBI:「拿，咁而家你話我地叫你『超智慧』、『高智慧』、『超高智慧』，係唔係即係話你『超更適合做金錢奴隸』呢？仲唔係貶意？比著我？同你反左面啦！
不過，尼個時候係廚房又真係有隻「菠蘿」發哂火咁喎.....
本故事純屬虛構，如有雷同實屬巧合
201101301826蜜瓜星雲歷險記:KUBI
(揮春）：恭喜發財
154我的傻瓜漫畫
KUBI、Marbo及蜜瓜星仝人
恭賀新禧
祝願大家
蜜運成功
蕉氣勃勃
201101301831蜜瓜星雲歷險記
:叉叉燒（揮春）： 恭賀新禧
140我的傻瓜漫畫
叉叉燒、KUBI、Marbo及菠蘿星仝人
恭賀新禧
祝願大家
蜜運成功
蕉氣勃勃
201101310029蜜瓜星雲歷險記:傾傾蕉（揮春）：萬事如意
144我的傻瓜漫畫
King-King-Jiu、KUBI、Marbo及香蕉星仝人
恭賀新禧
祝願大家
蜜運成功
蕉氣勃勃
201101310905蜜瓜星雲歷險記:
BIBIBA-（揮春）：龍馬精神
159我的傻瓜漫畫
KIKIKA、KUBI、Marbo及蜜瓜星雲仝人
恭賀新禧
祝願大家
蜜運成功
蕉氣勃勃
201102131110蜜瓜星雲歷險記(11):香蕉星人套裝
200我的傻瓜漫畫
話說阿KUBI
帶左隻個叫「傾傾蕉」嘅「香蕉星人」返去Marbo屋企，仲啱啱介紹左比Marbo識，至於點解佢地可以穿牆破壁咁由個窗門入尼，隻橙色大香蕉又點解可以由成隻直昇機咁大隻，忽然變到好似隻貓咁細，同埋既然「傾傾蕉」可以縱橫二次元世界點解又唔帶KUBI返蜜瓜星等等……Marbo就點講都講唔明勒！ 所以話呢，「低智慧宇宙人」即係「低智慧宇宙人」，咁高階嘅野都唔洗指意佢會明咯。
就係呢個時候，廚房傳出一陣怪聲，原來係隻「菠蘿星人」，菠蘿冰大帝「叉叉燒」係度發脾氣。不過，KUBI仔就好氣定神閒喎，佢只係同「叉叉燒」講左句野，隻「菠蘿」就好似好滿意咁笑哂。原來「叉叉燒」發脾氣係因為知道KUBI仔自己去左玩，冇帶埋佢去，KUBI仔同佢咁耐朋友梗係明啦，迷同佢咬耳仔應承帶佢去「香蕉星」玩補番數囉。你地米睇「叉叉燒」貴為一國之君，只要有得玩，佢就好易話圍架勒。
KUBI仔見Marbo咁好人，於是就話請埋佢去，Marbo當然高興，不過又有唔少問題，KUBI仔望左佢兩眼，笑笑口……
KUBI:「Marbo主人，你呢唔洗擔心聽日返工嘅問題，因為二次元世界嘅時間係唔同嘅，你地一分鐘已經相當於佢地好耐時間架勒。」
Marbo:「咁我會唔會有事架，果度有冇氧氣同水架？」
KUBI:「放心，絕對冇問題，不過你外型咁龐大，成層香蕉星大廈咁高，去到好多野都唔啱你用，你行出街真係成條街都唔夠你行囉！」
Marbo:「係喎，咁點算呢？」
KUBI:「哎，叫得你去，一定幫你諗掂！阿BIBIBA快啲攞件『香蕉星人套裝』出尼啦！」
BIBIBA:「係嘅，已經係度勒！Marbo主人，不如你試吓身先啦！」
BIBIBA話未講完就用個好似電筒仔嘅銀色野向Marbo照左一照，Marbo覺得眼前一黑，再打開眼就見倒自己同隻KUBI一樣咁細隻，而且仲變左條頭頂有三片天藍色機葉，有手有腳嘅黃色香蕉！
KUBI:「Marbo主人，唔洗驚，冇事嘅！拿你試吓件『香蕉星人套裝』，睇吓舒唔舒服，行兩步睇吓啦！」
Marbo唯有試吓，不過高科技即係高科技，佢完全唔覺得唔舒服，根本就好似冇著過衫咁，不過都仲係有啲擔心，只係KUBI真係好醒目，未等佢問已經答左先。
KUBI:「Marbo主人，唔洗擔心變唔番人喎！拿，邊有Up-Grade左嘅Down-Grade唔倒嘅呢？係唔係？」
KUBI二話不說，就按左一吓個「銀色電筒仔」，卜一聲，Marbo又放番大，變回原形，不過，佢身上啲衫就爛哂。
KUBI:「唔，睇尼地星啲物料真係差左啲。咁啦，BIBIBA，比多件『宇宙衫』阿Marbo主人當內衣著住，之後先至著件『香蕉星人套裝』啦！」
於是BIBIBA又攞左另外一個「金色電筒仔」出尼，向阿Marbo照左一照，Marbo又係覺得眼前一黑，再打開眼就見倒自己成身被件由頭笠到落腳，包到實哂嘅灰銀色緊身衣包住，件緊身衣嘅連身手套同短靴都係橙紅色，胸前有個好似西裝領嘅橙紅色大M字，個頭就好似帶左一個有蜜瓜綠色大眼罩，頭頂有支橙紅色蜜瓜叮嘅灰銀色頭盔，紅紅綠綠個樣都幾得意架！
Marbo:「舒服就好舒服，直情好似冇著咁樣，不過如果唔係又紅又綠就好勒！都唔明點解啲宇宙野硬係要咁嘅！」
KUBI:「我都明你貪靚扮cool，鍾意埋哂啲黑色野，不過你諗吓你咁大隻，啲香蕉星人又細膽又唔識你，對佢地呢講你係外星怪物，大紅大綠搞笑啲，大家會估你係忠嘅，黑古勒突，又尖眼又吊眉，鬼都當你係奸架啦！有時，形象嘅野，要為觀眾著想吓架！」
Marbo:「咁又係，可以慳番好多口水。」
KUBI:「哎呀，你地啲超人片都係個個紅紅綠綠架啦！」
Marbo:「咁又係，唔怪得啲超人咁鍾意，有啲仲著埋條紅色底褲出尼添！」
KUBI:「迷係囉！」
Marbo:「講時講，差啲唔記得問你地套衫係點除嘅？」
BIBIBA:「Marbo主人，好易架！拿，金色呢個係『宇宙衫』嘅裝卸遙控，只要你按一下呢個制，就可以解除，再對住自己按一下，咁就係裝著勒！銀色果個係『香蕉星人套裝』嘅裝卸遙控，用法一樣。」
Marbo:「啊！真係好方便喎！不過兩個遙控都唔知袋係邊，一陣唔小心跌左迷弊？」
KUBI:「唔洗驚，頭先BIBIBA已經幫你做左『意識植入』，你以後只要叫一叫佢地個名，個遙控就會係隻手度出現，用完再叫一叫佢地個名，個遙控又會自動消失架！」
Marbo:「咁勁！」
KUBI:「唔勁！好Cheap嗟，係蜜瓜星啲『十蚊店』大把啦！」
Marbo:「係勒，咁佢地叫乜野名呀？」
BIBIBA:「Marbo主人，頭先你一被個銀色遙控照倒嘅時候，個腦第一個出現嘅係What’s
Up，不過可能係接收不良，個遙控聽錯左做Swash，仲自動設定左！至於果個金色遙控，就植入左你果陣個心叫果個Wao字勒。」
本故事純屬虛構，如有雷同實屬巧合
201102141924蜜瓜星雲歷險記(12):宇宙衫
119我的傻瓜漫畫
大家正準備由Marbo廚房個雪櫃，通過「二次元隧道」去香蕉星，係出發之前，作最後檢查。BIBIBA就負責留守大本營「十卜」各人。Marbo先裝著好件「宇宙衫」，準備著埋件「香蕉星人套裝」，忽然福至心靈，諗一諗都係穩陣啲，帶番隻有響鬧功能嘅手錶，以免快活不知時日過，玩到唔識返工就幣啦！聽日返工仲要主持投資研討會，大家都等緊佢份報告，都米話唔緊要。
不過，佢果啲懶勁名錶，隻隻都係機械錶，貴就貴勒，但係又重又唔實用。最後都係帶左隻前幾日係鴨寮街貪得意買嘅「幾廿蚊兜」塑膠電子錶，個款簡潔、實而不華，「分唇」強勁、十項全能，唔好講咩響鬧計時、星期日曆咁濕碎，就算係光到可以照盲人嘅「內置電筒」都咁就手！跌撞唔爛、輕如冇野！平、靚、正！「Made
in China，Design
in Hong Kong」，你都米話唔令人佩服！
但係又好奇怪喎，佢一帶左隻錶係手，隻錶就同件「宇宙衫」融為一體，好似係原裝咁款，外面只係睇倒個黑色框同個亮起黃燈嘅圓形錶面，一啲都唔似係隻電子錶！想睇吓時間，隻錶又好神奇咁自己會跳啲時分秒出尼，想照明又即刻識開燈，總之好似有生命同識聽人指揮咁喎！
咪摸左一輪，各人都準備好勒，其實，最主要係等第一次去二次元世界嘅Marbo嗟！終於，大家都入哂雪櫃，「傾傾蕉」就呼一聲變大，打開左身上側邊個倉門，一隻「蜜瓜」，一隻「菠蘿」，同埋一條人扮嘅「香蕉」，就好舒服咁坐左入去，大家有講有笑，眼都好似未眨倒幾多下，話咁快就到左香蕉星啦！
香蕉星地方乾淨整齊，外表真係成隻巨型香蕉咁，黃色彎彎長長，好可愛。係香蕉星上面住左好多香蕉星人，佢地隻隻都心地善良，笑口常開，大人頭上唔係有唔同顏色嘅葉，就係戴上唔同款式嘅帽，細路仔就淨係得支叮仔，男左女右，真係好得意。佢地見倒「傾傾蕉」帶左朋友番尼，隻隻都好開心，好熱情咁來歡迎。Marbo因為著左「香蕉星人套裝」，大家都以為佢係移民外星回留返尼嘅鄉里，見倒佢頭上果三片天藍色蕉葉，仲讚不絕口添！
KUBI同大家介紹最近自己去左一個做「地星」嘅次元世界，又比大家睇佢啲旅行立體影像，其中仲見倒Marbo著左「宇宙衫」個巨人樣，個個都問係乜野生物，KUBI唔想話係Marbo，驚住嚇親人，就搶住話佢係「地星人」，不過佢係善良嘅低智慧宇宙生物，係蜜瓜星雲所有人嘅朋友，自己就係住係佢果度，仲叫大家得閒去佢屋企玩……Marbo心諗，呢次真係會好唔得閒勒！
不過，講番轉頭，KUBI果然冇呃Marbo，佢係香蕉星，真係一啲都冇唔習慣，而且果度空氣清新，四處綠草如茵，綠葉成蔭，啲車同屋好多都係設計成香蕉形，十足十童話世界。啲香蕉星人除左不停自我介紹，仲帶左好多好好味嘅食物尼招呼佢地，Marbo係咁兒飲淡清水，又真係好清涼甘甜喎！唔怪得KUBI話自己啲Krug香檳同法國生蠔都係普通野啦！
哎，真係而家先知，咩野係井底之蛙咯！
就係大家好開心嘅時候，突然天邊出現左一個巨大嘅黑影，Marbo雖然外星知識唔多，但係都有一種心有不妙嘅不祥感覺……
本故事純屬虛構，如有雷同實屬巧合
201102150847蜜瓜星雲歷險記(13):
鯉蜈岌革
114我的傻瓜漫畫
果一個從天而降嘅巨大黑影，原來係一隻好巨型嘅鐘形怪獸，隻怪獸個兇惡嘅臉上，生左兩個並排四方形嘅大口，一邊識噴火，一邊識噴水，兩隻橫伸嘅手臂上面又各自有隻生左三支鋼鑽嘅怪手，仲有六隻腳爬吓爬吓，外形都幾鬼肉酸。鐘形怪獸二話不說就係度大肆破壞，嚇到啲香蕉星人四散逃亡，有啲仲驚到唔識郁，腳都軟埋，淨係識得坐係地上喊。咁都好難怪佢地，因為香蕉星係一個十分和平嘅地方，蕉蕉都係「瞓、食、玩」，識笑唔識喊咁濟，唔好話武器，就算係打交都唔知幾多個宇宙光年未試過啦！
Marbo同KUBI地見狀，就即刻去幫手救人。
怪獸一邊破壞一邊大叫:「嘿嘿嘿！我係暗黑大將軍『鯉蜈岌革』大人，係偉大嘅狂星大帝『巧弒』大人派來嘅！你地啲淨係識『瞓、食、玩』嘅冇用宇宙人，大帝已經睇唔過眼好耐架勒！而家我地就係來統治你地，以後你地都要做『巧弒』嘅奴隸！」
果然係好邪惡嘅怪獸，Marbo真係估唔到去到二次元世界，都仲有啲咁唔文明嘅野！不過，佢唔知係唔係自細考試考得多，晨早已經變左考試大王，雖然果隻咩「巧弒」絕對唔係「考試」咁簡單，但係唔知點解，Marbo好似一啲都唔驚佢咁喎，唔通係因為去左二次元世界？
就係呢個時候，「鯉蜈岌革」怪獸越迫越近，就尼行到埋尼，仲想一腳踩向一班係對面街嘅小朋友！之不過，而家人人自危，而且隻隻香蕉星人都手無寸鐵，真係急都冇用……
本故事純屬虛構，如有雷同實屬巧合
201102160233蜜瓜星雲歷險記(14):
地星超人Earthman
123我的傻瓜漫畫
Marbo情急智生，係電光火石之間，突然諗起自己如果解除身上果件「香蕉星人套裝」，唔係可以變番原來地球人咁樣？照計應該同隻怪獸差不多大隻，可能可以頂一野，救番啲小朋友喎！佢諗都冇諗，即刻大聲叫Swash，手裡面果然出現左個銀色遙控，跟住就好自然向天舉起按制，不過可能係受到二次元空間嘅影響，個遙控仲發出一段好得意嘅音樂，bi-bu-bi-bu-bi-bu！跟住，Marbo就真係還原變番果個著住宇宙衫嘅地球人！
啲香蕉星人見倒佢巨大嘅身影，全身銀灰色又大紅大綠咁，好似好得意咁，斷估都估佢係忠嘅啦，再諗番之前KUBI比佢地睇嘅地星人影像，就興奮到大叫起來:「哇！地星超人，Earthman呀！」。
就係咁，Marbo就係二次元世界，無端端做左「地星超人」啦！
地星超人係二次元世界，等如去左小人國，變得力大無窮，而且由於引力唔同，又變成行動極度神速，佢差不多諗都未諗完，就已經呼一聲走左去隻怪獸面前，一手就舉起左佢係半空，雙腳用力一橕就飛左上天空，直情係識飛天遁地！
佢憑住多年睇「怪獸超人片」嘅經驗，通常啲怪獸被人掟出外太空，都會被大氣層燃燒爆炸嘅，係地面上睇仲會見倒好似放煙花咁靚嘅景象，真係慳水慳力又環保！正想一手將隻怪獸掟出去，點知隻怪獸好狡猾，向佢噴火偷襲，地星超人感到一陣火燒之痛，稍一鬆手就被隻怪獸脫左身。
地星超人一個翻身穩步著地，點知隻怪獸原來冇逃走，仲承機來個回馬槍，對手一伸長就捉住左地星超人，一邊噴火一邊噴水，令對手一邊受冷一邊受熱，真係睇見都戥佢辛苦。不過，好在佢件宇宙衫都好勁吓，暫時仲可以頂得住，之不過耐啲就真係唔知啦！
就係呢個「超人片」一定會出現嘅「好人捱打」情形下，跟住落尼就梗係會出現一段閃起紅燈嘅警鐘聲架啦！不過，呢個唔係乜野唔夠能量警告，而係仲緊要過能量警告，Marbo係地球出發前係隻錶設定起身返工嘅時間響鬧，咇、咇、咇，咇、咇、咇！即係要返去返工嘅時候就到勒，仲有三分鐘！
本故事純屬虛構，如有雷同實屬巧合
201102161919蜜瓜星雲歷險記(15):
地星死光
99我的傻瓜漫畫
地星超人知道要速戰速決，但又冇武器係手，心一急，見到個天都黑哂，忽然間下意識，想睇真啲環境就諗起要開燈，隻手腕上嘅手錶就即刻開著左個內置電筒，點知咁啱照倒隻怪獸，怪獸對手一被電筒嘅光線射到，就好似雪糕遇太陽咁馬上溶化，連口裡面啲火都熄埋！唔講唔知，原來地球嘅人造光源，即係以後邪惡外星人口中講嘅「地星死光」，竟然就係佢地嘅最大克星！
黑暗幾時都係最怕光明嘅！
地星超人好醒目，見狀即刻用個手錶對準隻怪獸，心諗住用最大火力發出最強光線，大叫一句「SAY-LA(死啦)！」，隻怪獸即刻被佢嚇窒，想走都走唔徹，被「地星死光」一野射中，成隻即刻溶化到變左一灘污水，連影都冇埋！地星超人見到任務完成，都係時候趕返地球返工，望左地上嘅香蕉星人一吓，知道佢地冇事先放心啲。不過可能係因為冇著「香蕉星人套裝」嘅關係，已經聽唔明佢地講乜，自己本來出聲同佢地打個招呼，但係佢地都只係聽倒咕嚕咕嚕，再見到KUBI同自己打左個眼色，就知道要扮吓野走人，然後再著番衫返屋企勒。
於是，地星超人伸出雙手舉向天，大叫Swash一聲，一邊揸住個銀色遙控一邊扮向外太空飛走，兜過圈靜雞雞係附近冇人見倒嘅地方降落，拿拿聲著番件「香蕉星人套裝」，再跟已經準備好一切，係度接應佢嘅KUBI仔一齊坐上「傾傾蕉」，呼一聲就飛番去地球囉！
本故事純屬虛構，如有雷同實屬巧合
201102250358蜜瓜星雲歷險記(16):
星星蕉
159我的傻瓜漫畫
拿，尼隻就係叫做Sing-Sing-Jiu「星星蕉」啦！大家都叫佢做「星仔」嘅。佢係香蕉星人，坐低時會摺埋果三隻尾翼夾係手，心口個CH46係佢嘅香蕉星編號，而家搭緊地鐵去返工。地鐵？係呀，你米以為淨係地星先有地鐵架，邊道有地底邊道都可以有地鐵架啦！係唔係？
唉，乜香蕉星人唔係淨係識得「瞓、食、玩」嘅咩？點解會去返工嘅？咁你就真係有所不知啦！原來香蕉星人連返工都係去玩嘅！即係咁，佢地只會做自己覺得好玩嘅野，如果份工好玩嘅，佢地迷去玩囉，唔係就唔玩架啦。簡單啲尼講，係香蕉星，係份工服務你，唔係你去服務份工，不過呢啲概念真係唔係「低智慧宇宙人」可以明白倒嘅。
睇緊呢個故事嘅朋友，如果真係唔明唔緊要，咁即係證明你係地星人嗟，係咁上下架勒，不過如果你睇得明，你就好有可能係「蜜瓜星雲」裡面啲宇宙人，只係你自己唔知道嗟！
講番轉頭，點解會講到星仔嘅呢？佢又同KUBI、Marbo有乜關係呢？星仔又係做咩嘅呢？
米住，點解香蕉星地鐵車廂會貼哂「地星超人」嘅海報嘅？
本故事純屬虛構，如有雷同實屬巧合
201102271048蜜瓜星雲歷險記(17):
孖寶蕉
146我的傻瓜漫畫
咁樣嘅，有讀者問Marbo，如果香蕉星人啲野咁好玩，隻「星星蕉」星仔仲洗搭地鐵咩，真頭飛過去迷得囉！佢係「飛天香蕉」尼加嘛！呢個問題真係唔係我呢隻「低智慧宇宙人」解釋倒嘅，都係問番啲香蕉星人好啲。點知阿星仔話，佢地連搭地鐵都係覺得好好玩嘅！真係咁都得？原來架香蕉星地鐵除左沿途有地底風景睇，例如係火山岩礁，地殼層風景區等等，車頭又有餐廳，車尾又有遊樂場，中間又有球場、K房……
哇！簡直係最佳渡假交通工具啦！
好啦，講番隻星星蕉，佢究竟搭地鐵去邊呢？原來佢係「香蕉星藝能界」最勁嘅「莊狸事務所」經理人，而家正係坐「香蕉鐵道999」，經由「星河無限極速多次元鐵路」去緊地星，目的地係Marbo屋企個雪櫃，即係上次由KUBI改造建成嘅二次元世界入口！不過，果陣KUBI可能貪玩一時手多，將個雪櫃嘅宇宙I.P.放左上蜜瓜星雲個網，結果就自動被個宇宙巡航系統Add左，而家已經變左做「香蕉鐵道999」係地星嘅總站，睇尼阿Marbo以後都會好唔得閒咯！
唉，咁阿星仔又做乜要來地星搵Marbo呢？
原來自從上次阿Marbo喬裝香蕉星人變身「地星超人」打敗隻「鯉蜈岌革」怪獸之後，人地個好先進嘅衛星系統晨早已經將成個過程，中高低廣角度環迴立體HD錄低哂，即時射哂上天落哂地入哂屋全星球廣播，Marbo同「地星超人」可以話係一夜成名，而家已經係最有人氣嘅二次元世界新偶像啦！
你地之前睇唔倒人地連地鐵全身海報都出埋咩？「宇宙扮大公司」啲「超合金魂」都出到第四版咯，「全黑別注」同「S.I.C.透明特別版」都炒爆左好耐啦！
咁快？
唔快啦，YUJU-MUGEN宇宙無限嘛！唔好唔記得地星一分鐘已經係二次元世界好多時間，Marbo雖然只係返左一日工咁大把，大大話話都成十幾粒鐘，正係拖住疲乏嘅身軀返到屋企，啱啱想休息吓，人地香蕉星已經過左唔少日子勒！正所謂一傳十、十傳百，香蕉星又電視又Cable又娛週又猛料大搜查日日播，偏偏Marbo佢又好似返左地星之後一去不返咁款，越冇得見越想見，啲觀眾梗係由腳板底痕到入心入肺啦！咁又乜辦法唔紅呢？係唔係？
呢期真係只要個封面求奇有個地星超人都即刻賣斷市，直情係起紙同票房收視保證啦！
當然，啲香蕉星人一直都以為Marbo係由地星回流返尼嘅同鄉，唔知佢其實係地星人喬裝嘅，而隻地星超人亦不過係佢還原自己，著左件緊身衫嗟！之前，以訛傳訛，佢地聽錯左仲以為佢叫「孖寶蕉」，因為香蕉星人名多數有個蕉字尾，就好似我地啲「乜ly勿dy」咁普遍，所以而家人人都叫左佢做Marbo-Jiu「孖寶蕉」勒！
講到呢度大家都諗倒星仔係想來簽阿「孖寶蕉」，同佢出唱片、搞Concert啦！之不過，講番轉頭，Marbo放工返左屋企，啱啱要去廚房酙水飲，就見倒個雪櫃門透出一道詭異藍光，一隻肥肥地，論論盡盡咁騰出尼嘅，就正係帶住黑粗框大眼鏡，成隻大黃色，個樣傻傻地嘅「星星蕉」啦！
星星蕉用佢把好卡通嘅聲講:「呀，我係香蕉星藝能公司『莊狸事務所』經理人，星星蕉，想搵阿Marbo-Jiu『孖寶蕉』，唔知你知唔知佢係邊度呢？」
Marbo因為唔知對方乜頭乜路，唔想隨便洩露身份，有口難言，而且佢都唔知自己被人叫左做孖寶蕉喎:「呀，你好。孖寶蕉？我……未聽過喎！」
星星蕉:「唔係喎，根據我地嘅資料，孖寶蕉應該住係呢度個喎。」
星星蕉望吓望吓Marbo，覺得佢個外形幾得意，但係又有啲可疑。
Marbo:「……」
星星蕉:「呀，呢位地星人，請問你高姓大名呢？」
Marbo:「哦……我叫做Marbo，一時唔記得自我介紹添，多多指教。」
星星蕉:「Marbo？唔……」星星蕉開始懷疑勒，就係呢個時候，KUBI咁啱同「叉叉燒」返左尼。
KUBI:「唉，你迷係星星蕉？咁錯蕩呀？」，KUBI連隨就招呼左佢入去個廳坐低，十足間屋係佢嘅咁，幾鬼自然呀！
星星蕉說明來意，KUBI同叉叉燒梗係知Marbo即係孖寶蕉啦！佢地仲口快快講自己識得孖寶蕉，不過話未講完，先至醒起阿Marbo其實係喬裝香蕉星人去香蕉星個喎，如果而家話眼前呢隻「低智慧宇宙人」就係，第一唔知天生細膽嘅香蕉星人頂唔頂得順，第二又唔知阿Marbo佢Like唔Like喎？佢地兩對大圓眼睛，你眼望我眼，唯有急急腳補飛話孖寶蕉佢咁啱出左門未返，有乜請講低果類囉！
星星蕉聽倒就好開心咁話:「咁你地有冇興趣幫手搵阿孖寶蕉一齊夾BAND玩吓呢？」
「菠蘿冰大帝」叉叉燒一聽倒，直頭係興奮到尖叫啦！原來佢係菠蘿星嘅「超級殘酷一叮」冠軍電結他手，最大夢想就係搵唔同嘅宇宙人夾番隊全二次元世界最勁嘅BAND出碟搞Concert架勒！
吓？菠蘿星都有電結他？
係呀，你地地星夠有菠蘿啦！點解人地會冇你地啲野嗟？
@@
本故事純屬虛構，如有雷同實屬巧合
201102280906蜜瓜星雲歷險記(18):
Magenta
128我的傻瓜漫畫
星星蕉講完，見阿KUBI地對夾BAND咁有興趣，真係好開心，可謂不枉此行！公司啱啱急CALL，佢於是就留低左個電子名片同資料比佢地，又即刻走番入個雪櫃度，咈一聲就返左去香蕉星勒！KUBI同大家睇完哂啲野，你眼望我眼，真係有啲唔敢相信喎！不過事實擺在眼前，而且夾BAND登台咁好完嘅野，真係諗吓都開心啦！
KUBI:「阿Marbo主人，呢期你就發啦，原來成個香蕉星而家你最紅喎！梗係你做主音啦！」
Marbo唔係唔鍾意，只係有啲擔心:「我細細個夾過吓BAND嘅，不過已經好耐冇玩，而且果陣都係好騎尼，我諗唔係幾掂喎！不如KUBI做主音，我彈琴啦！」
叉叉燒:「唔怕啦，玩吓之嘛！而且人地係鍾意你丫嘛，你個香蕉星人造型咁行，比啲信心，我叫成個菠蘿星來支持你勒！拿，一於你做主音，KUBI彈Keyboard啦！」
KUBI:「係呀，衰左都係香蕉星嗟，地星人最多迷返番地星囉！而且，香蕉星係彈蜜瓜電子琴個喎！」
Marbo:「吓？蜜瓜電子琴！」
KUBI:「係呀，好得意架！你唔識架啦！」
叉叉燒:「唔好你推我讓啦，不如去夾吓先啦！好心急啊！」
於是，佢地三個就由個雪櫃走左入去KUBI個二次元屋企，原來阿KUBI都係音樂迷，成房都係高級音響、樂器同登台靚衫！雖然Marbo冇件蜜瓜星樂器識玩，不過佢地啲樣同自己識果啲大同小異，都估倒吓係乜，但係正如阿KUBI講，呢次真係唱易過彈喎！佢地求奇搵隻歌尼試吓，結果一拍即合，效果好到冇人信！可能係人地科技先進，又可能係Marbo以地星人嘅Size屎，縮細左做香蕉星人，即刻變左「歌壇巨肺」，唱親歌都要放支咪係心口咁濟，又點會話唔夠氣呢？直頭係香蕉星天王啦！
KUBI好滿意:「哇，Marbo主人，好掂呀！」
Marbo都好開心:「又真係幾OK喎！呢次真係自己出拳，自己都驚呀！」
叉叉燒直情跳起身大叫:「哇！發達啦！發達啦！今次真係可以夾番隊全二次元世界最勁嘅BAND啦！」
跟住佢地就正式成立左隊樂隊，仲改左個好Rock好有型嘅名: Magenta！
點解叫Magenta？係KUBI諗嘅，佢話用地星名有新鮮感啲，一睇就知係進口貨，成個宇宙名牌咁款！拿，Magenta係「紫紅色」，即係話佢地會大紅大紫啦！而且有Marbo個M字，啲歌迷會易記啲，食住個勢丫嘛！估唔到成日淨係識玩嘅人，都幾有商業頭腦喎！
本故事純屬虛構，如有雷同實屬巧合
201103020633蜜瓜星雲歷險記(19):
咭咭蕉
103我的傻瓜漫畫
阿KUBI、Marbo同埋「叉叉燒」一齊夾Band，仲改左個好有型嘅搖滾樂隊名Magenta。佢地夾Band夾到不知時日咁濟，真係好開心，仲越玩越有靈感，即時作左唔少勁歌，首首都好似會好Heat果個款喎！於是，大家就諗不如趁個勢咁行，即刻去香蕉星搵阿「星星蕉」簽約囉。KUBI拿拿聲Call番張「電子名片」出泥，果張「電子名片」話就話係名片，其實係一個小型機械人，叫做「咭咭蕉」Card-Card-Jiu，外形四四方方，兩手兩腳，全身淡青金色，正面白色，頭頂左邊豎起左四支青綠色香蕉葉，走路時搖吓搖吓，粗眉大眼，一個四方形大嘴巴，可以顯示立體圖象同互動影象，都幾得意架。
只要收左「咭咭蕉」嘅人一叫:「咭咭蕉出來！」，佢就會即刻係二次元空間走出尼，用完之後佢又會自己閃番入去，一啲都唔會阻地方架！對佢說明要求，只要係同主人「星星蕉」之前吩咐過有關嘅野，咭咭蕉都會好忠誠咁盡全力完成。如果係未有紀錄嘅事項，佢又識得分析，權衡輕重，然後再決定洗唔洗聯絡主人問清楚，總之一定要有主人首肯，佢先會執行未有預先設定嘅野，係一隻十分可靠嘅機械人尼架！
咭咭蕉，好有禮貌:「呀，各位你地好呀，請問有乜吩咐呢？」
KUBI，好有禮貌:「你好呀，咭咭蕉！我地想去見你主人『星星蕉』喎，可唔可以安排一吓呢？」
咭咭蕉，諗都唔洗諗:「可以嘅。咁係用最快嘅方法，定係用最舒服嘅方法呢？」
Marbo，諗都唔洗諗:「用最快嘅方法啦！」，果然係香港人，成日想快！
叉叉燒，諗都唔洗諗:「咁有冇最豪嘅方法架？」，果然係大帝，成日想嘆！
咭咭蕉，諗都唔洗諗:「有嘅。」，果然係做野，乜都OK！
KUBI，諗都唔洗諗:「咁有冇最好玩嘅方法架？」果然係蜜瓜仔，成日想玩！
咭咭蕉，諗都唔洗諗:「都有架。」，果然夠專業，乜都OK！
不過呢次死啦，原來去香蕉星有咁多方法，佢地又各有要求喎！為左咁就傾左一大輪，哇啦哇啦，又好鬼熱鬧喎！不過最後，一路無出聲係旁邊齋睇嘅咭咭蕉，突然間笑到咭咭聲講左句野，即刻全場啞哂，係乜野？迷係下面呢句囉！
咭咭蕉笑到咭咭聲:「其實你地都唔洗傾咁耐嘅，咭咭咭咭！最快、最舒服、最豪、最好玩嘅，都係同一個方法尼之嘛！點都係佢架啦！」
三個傻瓜:「吓？咁都得！」
咭咭蕉又笑到咭咭聲，差啲碌左落地:「係呀！咭咭咭咭！」
咁，唔怪得佢叫「咭咭蕉」啦！
@@
本故事純屬虛構，如有雷同實屬巧合
201103021533蜜瓜星雲歷險記(20):蘑菇屋
115我的傻瓜漫畫
得阿咭咭蕉咁講，真係大家都啼笑皆非，直頭啞得一陣陣，不過諗深一層，三隻傻瓜又突然笑到碌左係地，心諗呢隻咭咭蕉又真係幾好玩個喎，咁嘅野都識得用尼整蠱人。
佢地於是問:「咭咭蕉，咁你究竟諗住係用咩方法去香蕉星架？」
咭咭蕉:「啊，之唔係叫架『香蕉星的士』去咁簡單囉，平、靚、正！」
Marbo:「香蕉星的士？」
咭咭蕉:「係呀，叫架豪華舒適好玩快版嘅，連司機啱啱裝倒五個人！」
KUBI:「咁，唔豪華舒適好玩快版嘅呢？」
咭咭蕉:「裝倒五十人！」
叉叉燒:「乜差咁遠架，咁中間呢？」
咭咭蕉:「裝倒二十五人！」
Marbo:「咁得意嘅？咁佢地個Size屎迷好大分別囉？」
咭咭蕉:「唔係喎，Size屎一樣。」
叉叉燒:「即係設備差好遠囉！」
咭咭蕉:「唔係喎，設備一樣喎。」
KUBI:「咁都得？」
咭咭蕉:「係呀，同一架本來可以好好地服務五十人嘅的士，裝一半迷豪華舒適好玩行得快啲囉，再裝少啲，得番五個人就梗係最正啦！一個人牙，簡直係給你一個五星級的家啦！」
三個傻瓜:「吓？咁都得！」
咭咭蕉:「係呀！咭咭咭咭！」
於是咭咭蕉就攞個宇宙手提電話出尼，即係佢隻右手啦，對住佢咕嚕咕嚕講左一大堆唔知乜野，就好有禮貌咁叫大家出門，因為架「香蕉星的士」好快就到。佢地一行人打由二樓行樓梯落去，穿過左個粉藍色嘅圓形大廳，打開左度大門，行左出去外面，係碧藍到有啲令人眩目嘅晴朗無雲天空下，前面係一條彎彎曲曲嘅小路。回頭一望，Marbo先留意倒阿KUBI間二次元屋企，原來係一隻座落係橙色小山上面嘅巨型紅頂白身大蘑菇！隻大蘑菇頂有三個橢圓形大窗，個白色到好似雪咁白嘅蘑菇身正中央，有一度粉綠色半橢圓形大門，旁邊仲有隻好得意嘅四格窗口，直情係童話世界啲款咁！
本故事純屬虛構，如有雷同實屬巧合
201103040320蜜瓜星雲歷險記(21):
飛天海豚
133我的傻瓜漫畫
KUBI地係個蘑菇屋門口前等左一陣，突然係個碧藍天際，由細到大，由遠至近，出現左個大旋渦，中間仲飛出左隻上半邊身海藍色，下半邊身雪白色嘅巨型飛機形宇宙生物！睇真啲，佢個樣又有啲似條生左對大翅膀嘅藍色海豚，對翼各自有個好巨型嘅螺旋槳引擎，圓臉上一對大眼睛，一個狗仔圓鼻仔，時時都掛著笑容，個樣有啲傻傻地咁，真係十足十一隻「飛天海豚」。佢好得意，原來對螺旋槳引擎可以垂直向上向下轉動架。拿，話都未講完，佢就將對引擎垂直旋轉向上，成隻直昇機咁向下降落左係KUBI地面前！
直直直直……不過，佢對巨型引擎真係好鬼嘈，馬力又好強大，吹到成地沙塵滾滾，搞到周圍啲野飛起哂！
咭咭蕉就好論盡咁一邊按住頭頂果幾條被吹到搖搖擺擺嘅蕉葉，一邊大聲同大家講野:「各位，呢架就係我啱啱叫嘅香蕉星的士『飛天海豚』，佢個名叫『多芬蕉』Dolphine-Jiu！」
KUBI各人盡哂全力嗌:「哦！」
咭咭蕉撥開塊啱啱被風吹左係臉上嘅蕉葉:「咁大家上『蕉』先啦！」
KUBI各人盡哂全力嗌:「哦！」
於是，佢地一行四隻就係風大塵大之下，幾狼狽吓咁就急急腳上左機，即係走左入去隻「飛天海豚」個肚裡面。遠睇又有啲似人地「海軍陸戰隊」或者「特種部隊」上直昇機出擊咁，都米話唔型架！不過，一入左去個機倉，又真係好似去左第二個世界咁喎！首先，個機倉真係大到無倫，不但設備豪華，裝修一流，成個機倉白雪雪，鋪哂柔軟舒適嘅厚身皮草，坐落去直情好似成個被隻大毛公仔攬住咁舒服！而且，仲隔音一流，一啲噪音都聽唔倒，靜到支針跌落地碌左去邊都幾乎聽倒！
「多芬蕉」好有禮貌，用室內立體視像同大家自我介紹一番，一邊講解行程同報告當地天氣，一邊就起飛準備去香蕉星啦！只見窗外嘅藍天突然之間泛起一個大旋渦，隻「多芬蕉」就好開心咁跟住個旋渦飛左入去……
Marbo/ Mapochi
ORIGINAL STORY DRAWINGS BY MAPOCHI, ALL RIGHTS RESERVED
本故事純屬虛構，如有雷同實屬巧合
201103061755蜜瓜星雲歷險記(22):多芬蕉
132我的傻瓜漫畫
上次講到Marbo係KUBI間二次元蘑菇屋，著左香蕉星人套裝，變身做左「孖寶蕉」，再同KUBI、叉叉燒、同埋隻好鬼鬼馬嘅「咭咭蕉」一齊坐住架香蕉星的士，「飛天海豚」多芬蕉，起程去香蕉星揾藝能公司經理人「星星蕉」簽約。佢地唔覺唔覺，坐住隻「多芬蕉」，裡面啲野都未玩得哂，就來到左香蕉星，安全降落左係個「香蕉星際機場」上面。佢地個個心情愉快，好開心咁就踏出左機倉，話口未完就見倒「多芬蕉」呼一聲縮細左，由成架巨型直昇機咁大隻，眨眼之間變左好似佢地咁丁隻，真係神奇！
Marbo:「多芬蕉，乜你可以變大縮細嘅？」。唔止，佢對翼仲識得打直摺埋添！
多芬蕉:「係呀，孖寶蕉，我地『飛天香蕉』隻隻都識架！不過其他香蕉星人就唔一定識啦！」
Marbo十分好奇:「點解你變番細呢？大隻唔係可以帶我地到處飛囉？」
多芬蕉:「唔得架，我仲未考倒『香蕉城』變大飛行牌照。」
Marbo:「變大飛行牌照？」
多芬蕉:「係呀，唔係隻隻『飛天香蕉』都可以咁大隻到處走架，如果我地隻隻都係咁，一陣間就會整爛哂啲野架勒！而且，咁大隻好浪費地方，好唔環保架！」
Marbo:「又係喎！哎，如果地球啲人縮細哂，唔係可以解決好多居住、糧食問題囉！」。佢心諗，唔怪得上次「鯉蜈岌革」來破壞，佢地冇變大幫手啦，原來係咁，香蕉星人又真係好守規矩喎！而且，飛天香蕉淨係識載貨，都唔識打怪獸啦！
KUBI:「係架，不過佢地要有呢個智慧同科技，可能要過多一萬年勒！」
Marbo:「你地幫手唔得咩？」
叉叉燒:「唔得架，如果我地出手，隨便插手人地星球嘅進化，係好唔文明嘅！蜜瓜星雲嘅宇宙人係善良嘅宇宙人，唔做呢啲咁嘅野架！」
Marbo:「哦！」。原來佢地真係好高智慧同自律嘅！
多芬蕉:「拿，我而家就帶你地一齊搭車去搵阿『星星蕉』啦！」
KUBI眾人:「唔該哂！」
多芬蕉:「唔洗唔該！」
KUBI:「唉！多芬蕉，你個皮箱好得意喎！」
多芬蕉:「係呀！係『菠蘿星』嘅朋友送嘅！」
叉叉燒:「哦，乜你去過我個星球咩？」
多芬蕉:「係呀，之前順路嗟！而且，由果度去地星又近好多呢！」
咭咭蕉:「唔係佢點會收得咁平喎，咭咭咭咭！」
Marbo:「呀，有機會去吓菠蘿星就好啦！」
叉叉燒:「梗係歡迎之致啦！」
KUBI:「菠蘿星係二次元世界嘅名勝呢架，第二日我地一定要帶你去行吓！」
Marbo:「哇！太好啦！多謝哂！」
多芬蕉:「好啦，而家我地一齊去搭車啦！」
佢地一行人就係咁，有講有笑就出左機場門口，眼前係一片好青綠嘅草地，簡直係一望無際，香蕉星真係好大自然，到處都係青山綠水，成個星球都係綠色咁濟。話未講完，冇幾遠就見倒隻好得意嘅野……係度玩單腳企？
P/S:今次畫嘅「多芬蕉」，Marbo最鍾意佢個好似好掂嘅樣，有啲似狗仔，仲有係條尾同個皮箱，都係自己好鍾意嘅，「多芬蕉」咬住果支係類似「珍寶珠」或者「波板糖」果種糖果支棍，唔係煙，Marbo一向反對吸煙，又點會畫呢？
本故事純屬虛構，如有雷同實屬巧合
201103081052蜜瓜星雲歷險記(23):傻e蕉
128我的傻瓜漫畫
係一遍睇唔倒盡頭嘅綠草如茵大地，眼前見倒都係好似鋪左綠色短毛地氈咁，啲草生得好整齊，唔太長又唔太短。呀！有啲似高爾夫球場果啲草坪一樣，或者可以咁樣講，香蕉星係一個用高爾夫球場造嘅星球，可能都幾貼切！係Marbo地出左機場門口冇幾遠，就見倒一隻好得意成隻都係草綠色嘅野，佢成日係度玩單腳企，個身左搖右擺，唔知幾好玩咁，仲笑到卡卡聲。
睇真啲，佢個外形真係十足一條V字形嘅大香蕉，頭尾都有三片長長嘅直昇機蕉葉，個頭圓圓地，臉上中央有個大T字，上面兩隻大眼睛，下面一個笑到見倒成棚大白牙嘅大嘴仔，真係人見人愛！點知都未等佢行過尼，多芬蕉就好熱情咁大叫起尼，直奔過去，同隻綠色香蕉Say-hi，仲Give
me five！大家左手拍右手，右手拍左手，上上下下左左右右前前後後，跟住齊齊轉身，你個尾撞吓我個尾，我個尾又撞吓個你尾！
多芬蕉:「Yo！各位，呢個就係我嘅死黨，『傻e蕉』，Saw-ee-Jiu啦！」
傻e蕉:「Yo！What’s up
man！I’m Saw-ee-Jiu，How you
doing man？」
大家即刻做左個V字手勢，好有節奏咁大叫:「Yo！What’s up！」
多芬蕉見大家咁有Feel，即刻放低佢果隻摺埋係背脊嘅翼係地下，搞左兩搞，對翼就變左個唱片機，對引擎就變左對大喇叭，佢帶住個桃紅色大耳罩Headphone，搖身一變仲做埋「DJ蕉」！就係咁，一陣又一陣強勁嘅Hip-Hop音樂，就係呢片一望無際嘅草地上，源源不絕咁響起！哇，直頭好似去左紐約哈林區咁！好Hip-Hop吓喎！KUBI都唔執輸，即刻瞓左落地，用佢頭頂條T字丁支撐成隻瓜，好瀟灑咁來過無手Head-Spin！呵！乜原來佢係Break
Dance高手尼架？真係估你唔倒！
Marbo自從變左身做香蕉星人「孖寶蕉」都身手不凡左，佢同「咭咭蕉」仲有「叉叉燒」，一邊拍手踩腳打節奏，一邊又跳又叫，成斑黑人街頭Hip-Hop大師咁，搞到個氣氛好熱鬧。周圍啲香蕉星人見倒咁熱鬧，都忍唔住過來圍觀，大家唔好唔記得，香蕉星人最鍾意就係玩架啦！佢地有樣學樣，你跳我又跳，係You
dance I dance，唔係You
jump I jump，唔洗幾分鐘，成個場搞到好似嘉年華會咁勁歌熱舞！可能係Marbo跳得太投入，又或者係佢頭上果三條天藍色蕉葉太搶眼，啲人突然認出左佢就係果次變身造「地星超人」嘅最新人氣偶像「孖寶蕉」！
Fan屎A:「哇，你迷係果日變身造地星超人嘅孖寶蕉？」
Fan屎B:「係喎！我認得佢條天藍色嘅蕉葉呀！真蕉呢架！」
Fan屎C:「哇，你地迷係佢老友，叉叉燒同KUBI仔？好得意呀！」
Fan屎D:「你地跳舞好勁喎！Yo！」
啲Fan屎好開心，個個停哂係度睇，仲一邊拍手打氣，香蕉星人好有文化，佢地就算見倒偶像，都唔會亂來，好識尊重人嘅。
不過Marbo地就有啲緊張同唔好意思，老實講，咁大個仔都未試過呢啲場面喎！
本故事純屬虛構，如有雷同實屬巧合
201103220807蜜瓜星雲歷險記(24):MAGENTA來了!
65我的傻瓜漫畫
話說大家都玩到好開心，一時興起，Kubi就播埋隻佢地Magenta樂隊之前排嘅歌出尼，同Marbo大唱特唱，即刻就將現場氣氛推到高峰，個個跳舞大叫Magenta，玩到冇哂力咁濟！人群之中，呀，唔係，係蕉群之中先啱，忽然有一隻好黃色嘅肥野，左搖右擺咁走左出尼，原來係「星星蕉」喎！
嘿，原來「傻e蕉」係香蕉星出名嘅Dancer尼架，即係類似日本阿Sam果隻啦，今日有咁多Fans尼，其實都係星星蕉間經理人公司一手籌劃嘅！
不過，連星星蕉都估唔倒呀Marbo地咁投入，咁快就可以同啲Fans打成一片。好自然，今次嘅機場Hip-Hop大會，就成為左佢地隊Magenta樂隊嘅出道之作啦！
之後，佢地又會有乜搞作呢？下次迷知囉！
本故事純屬虛構，如有雷同實屬巧合
201103280719蜜瓜星雲歷險記(25):神槍手獨行蕉
114我的傻瓜漫畫
以下係香蕉星MGM大電影「獨行蕉---西部蕩寇」嘅最新宣傳內容，各位外星人影迷請密切留意映期！套戲係香蕉星搖滾樂勁旅Magenta，唱而優則演嘅最新力作，互動立體大電影:「獨行蕉---西部蕩寇」！劇情係講係好耐之前嘅香蕉星尚未開發嘅西部地區，到處都係沙漠同荒野，仲有好多外星人山賊出沒，而負責維持治安嘅就只有正義嘅神槍手，由Marbo-Jiu飾演，人稱「神槍手獨行蕉」嘅「奇連伊士蕉」！
今日，平靜嘅香蕉鎮，蒞左兩個身手不凡嘅槍手，原來佢地就係大名鼎鼎嘅星際頭號通緝犯，由Kubi飾演嘅「艾利華古比」，同「叉叉燒」飾演嘅「李雲奇理燒」！佢地究竟有乜目的呢？「奇連伊士蕉」又可唔可以一個人應付倒佢地兩個嘅挑戰呢？記得蒞香蕉星睇啦!
本故事純屬虛構，如有雷同實屬巧合
201103281805蜜瓜星雲歷險記(26):綿羊仔星人
119我的傻瓜漫畫
由於Magenta三子，Marbo、Kubi同叉叉燒係香蕉星大受歡迎，唔單只啲歌上哂流行榜No.1，啱啱上畫果套大電影「獨行蕉---西部蕩寇」又破哂票房紀錄，所以就好多人蒞搵佢地拍廣告啦！拿，其中仲有來自「棉羊仔星」嘅當紅組合「V仔」，就係佢地第一個合作，衝出香蕉星嘅藝能界勁旅啦！大家睇吓佢地拍嘅封面Poster幾有型！一共有三款，今日出住Kubi同棉羊仔星人Vibi果張先啦！
Kubi;「哇!
原來棉羊仔星有好多好好味嘅棉花糖食架!
」^^
Vibi:「係呀!
棉花糖係我地嘅出名美食，各位外星人朋友，多啲蒞幫襯啦!
」
Kubi同Vibi一邊食，一邊玩，真係開心勒!
本故事純屬虛構，如有雷同實屬巧合
201103290703蜜瓜星雲歷險記(27):好大風呀!
217我的傻瓜漫畫
叉叉燒:「哇！香蕉星海邊真係好…大…風….呀！」
綿羊仔星人Vivi:「係…呀…坐…穩…啲…啦！」
Woo…woo…woo！
201103292007蜜瓜星雲歷險記(28):粟米星!
123我的傻瓜漫畫
至於Marbo呢？佢就同另一隻綿羊星人Vibo一齊為粟米星拍左個廣告啦!
Marbo:「哇，好多又大又甜嘅粟米呀！」
Vibo:「係呀!
粟米又好味又有益，大朋友同小朋友都啱食架！」
Marbo:「Yo!我地個個都鍾意架！」
Vibo:「快啲蒞粟米星玩啦！」
Marbo:「Yo!」
本故事純屬虛構，如有雷同實屬巧合
201103311011蜜瓜星雲歷險記(29):蔬菜星人
227我的傻瓜漫畫
Marbo同Kubi都知道好多小朋友唔係好鍾意食蔬菜喎，於是係香蕉星拍完廣告就順便去「彩虹橋」搵吓「蔬菜星人」傾吓。原來「蔬菜星人」係發明蔬菜嘅宇宙人，佢地仲負責培養同推廣優質嘅蔬菜比全宇宙架！
Marbo:「蔬菜星人Baki，聽Kubi講我先知道原來我地平時食嘅蔬菜都係由你地『發明』架？」
白菜仔Baki:「係呀，蔬菜係我地發明嘅食物，目的係令宇宙人身體健康，咁就有精神玩多啲啦！」
小棠菜仔Bako:「拿，你地諗吓啲蔬菜嘅生長過程，由細細粒嘅種子一路發大幾百萬幾千萬倍，最後變形至成棵菜，呢啲迷係典型嘅外太空宇宙人先進科技尼囉！地星人啲產品咁落後，好似啲電腦、汽車、家品之類，識唔識得變大同變形呀？有排都未得啦！」
Marbo:「咁玩具都有變形金剛嘅。」
Baki:「果啲唔係『有機』架嘛！傻佬！」
哈哈哈哈哈！大家即刻笑到碌地！
Marbo:「哈，講時講，唔怪得你地個樣成棵菜咁啦！」
Baki:「當然啦！我地梗係用番自己個樣尼做商標啦！即係好似Kubi，啲蜜瓜都係佢地發明嘅產品，梗係用番佢地個蜜瓜樣啦！」
Marbo:「吓？乜原來蜜瓜星人係發明蜜瓜嘅宇宙人尼架！咁，菠蘿星人……」
Kubi:「迷係發明菠蘿嘅宇宙人囉！」
Marbo:「咁，Kubi你上次蒞地球嘅原因……」
Kubi:「之唔係蒞視察吓蜜瓜係地星嘅生產情況同賣成點囉！」
Baki:「其實我同小棠菜仔Bako都成日會去唔同嘅星球視察架，不過地星就真係好似特別多小朋友唔鍾意我地啲產品喎！」
Bako:「好傷心啊！」
Kubi:「唔好傷心，可能係你地啲蔬菜個樣太得意，啲小朋友唔捨得食喎！」
Baki:「但係我地發明啲蔬菜出尼，係想被人地食用架嘛。即係好似廚師，最開心梗係見倒啲人鍾意食佢煮嘅野架啦！」
Kubi:「咁又係，係生果星人都想自己發明果隻生果受歡迎嘅！啲宇宙生物唔食，又點可以幫啲生果、蔬菜、植物傳播種子？啲種子傳播唔倒，最後迷會係果度絕種囉，好似啲舊款電器咁……」
Bako:「好可憐啊！」
Marbo:「唔緊要啦，地星其實都有好多人鍾意蔬菜同生果架，下次我返去幫你地Promo多啲啦！」
Baki:「係喎，Marbo你係移民地星嘅香蕉星人，一定好熟悉果度勒！下次蒞搵你幫手就啱啦！」
Kubi:「最緊要係叫啲人唔好污染啲地方，同埋唔好成日用啲劣質化學物品尼毒我地啲發明品！」
Marbo:「冇錯，除左叫啲人食多啲蔬菜生果，仲要叫佢地注意環保！」
大家:「Yo！」
各位小朋友，咁你地又會唔會幫手呀？
Marbo/ Mapochi
ORIGINAL STORY DRAWINGS BY MAPOCHI, ALL RIGHTS RESERVED
本故事純屬虛構，如有雷同實屬巧合
沒有留言:
發佈留言